Abaı oblysynyń jylý ortalyqtaryndaǵy jóndeý jumystary 85%-ǵa aıaqtaldy

Abaı oblysyndaǵy jylý elektr ortalyǵyndaǵy jóndeý jumystary búginde 85%-ǵa aıaqtalyp otyr, dep habarlaıdy QazAqparat tilshisi.

Oblys ákimdiginiń málimetine súıensek, óńir boıynsha jylytý maýsymyna daıyndyq jumystary josparǵa sáıkes júrgizilýde. Búginde jóndeý jumystarynyń 85%-y oryndalǵan. Barlyq jumystardy 30 qyrkúıekke deıin aıaqtaý josparlanyp otyr.

Aımaq basshysy Nurlan Uranhaev oblystyq qoǵamdyq keńes múshelerimen jáne máslıhat depýtattarymen birge Semeı qalasynyń qazandyqtaryn, magıstraldyq jylý jelilerin tekserdi. Onyń ishinde «Ǵabbasov» qazandyǵy, Boztaev kóshesindegi magıstraldyq jylý jelisi, «401 kvartal» ortalyq jylý pýnktin aralady.

«Ǵabbasov» qazandyǵyn jóndeý jumystaryna basa nazar aýdarylǵan. Qazandyqtaǵy jumystar belgilengen merzimde, ıaǵnı qyrkúıek aıynyń sońynda aıaqtalady.
«Jóndeý jumystarynyń qarqynyn arttyryp, qadaǵalap otyrý qajet. Osy baǵytqa jaýapty oblys ákimdiginiń basqarmalary, qalalar men aýdandar ákimdikteriniń bólimderi jóndelip jatqan jylý ortalyqtarynyń basy-qasynda bolyp, kúndelikti tekserýi kerek. Jóndeý jumystary ýaqytyly aıaqtalýy tıis. Halyq kútip otyr», - dedi Nurlan Uranhaev.