Abaı oblysynyń turǵyny JOO-ǵa túsirýge ýáde berip, 2,5 mln teńgeni ıemdengen

ASTANA. KAZINFORM — Abaı oblysynda ýnıversıtetke túsýge kómek kórsetem degen syltaýmen alaıaqtyq jasaǵan kúdikti er adam ustaldy, dep habarlaıdy oblystyq PD baspasóz qyzmeti.

Polıtsııaǵa Jańasemeı aýdanynyń 41 jastaǵy turǵyny alaıaqtyq faktisi týraly aryzdanǵan. Onyń aıtýynsha, belgisiz jas jigit bıyl mamyr aıynda onyń 18 jastaǵy ulynyń ýnıversıtetke túsýine kómek kórsetemin dep senimin paıdalanyp, 2 500 000 teńge kóleminde aqshasyn jymqyrǵan. 

Jedel is-sharalar barysynda polıtsııa qyzmetkerleri Semeı qalasynyń 41 jastaǵy turǵynyn anyqtap, polıtsııa bólimine jetkizdi.

— Qazirgi tańda oǵan qatysty alaıaqtyq boıynsha tekserý júrgizilip jatyr. Kúdiktige protsessýaldyq quqyqtary túsindirilip, kelý mindettemesi alyndy. Oqıǵanyń barlyq mán-jaıy anyqtalyp jatyr, — delingen habarlamada.

Abaı oblysy Polıtsııa departamenti azamattarǵa ýnıversıtetke túsý, jumysqa ornalasý nemese qujattardy rásimdeý boıynsha «kómek» kórsetý týraly ýádelerge, ásirese beıtanys adamdardyń sózine senbeýge shaqyrady.

Buǵan deıin Almatyda memlekettik múlikke qatysty alaıaqtyq shemany uıymdastyrǵandar sottalǵany málim boldy.