Abaı oblysynyń turǵyny adam saýdasy úshin 6 jylǵa sottaldy
SEMEI. KAZINFORM — Abaı oblysy Aıagóz qalasynyń turǵyny adam saýdasy faktisi boıynsha kináli dep tanylyp, 6 jylǵa bas bostandyǵynan aıyryldy.
Qylmystyq is Aıagóz aýdandyq sotynda qaraldy. Belgili bolǵandaı, 2024-2025 jyldary aralyǵynda aıyptalýshy áleýmettik turǵyda osal sanattaǵy azamattardy ádeıi izdestirgen. Negizinen ol Semeı qalasyndaǵy temirjol vokzaldary men bazar mańynda júrgen adamdardy nysanaǵa alǵan.
— Jábirlenýshilerdiń kóbi mas kúıde bolyp, jumysqa ornalastyrý týraly ýádelerge ońaı sengen. Osydan soń áıel olardy túrli sharýa qojalyqtaryna jiberip otyrǵan. Al fermerler aldyn ala jumys úshin tólegen 100 myńnan 400 myń teńgege deıingi qarajatty óz qaltasyna basqan. Іs barysynda osyndaı bes epızod tirkeldi, — dep habarlady sottan.
Keıbir jaǵdaılarda aıyptalýshy jábirlenýshilerdiń qozǵalý erkindigin shektep, qorqytý, psıhologııalyq qysym kórsetý jáne alkogolge táýeldi etý tásilderin qoldanǵan.
Sotta áıel adam óz kinásin tolyq moıyndap, istegenine ókinish bildirip, keltirilgen shyǵyndy ótep, jábirlenýshilermen tatýlasqan. Soǵan qaramastan, sot ony 6 jylǵa bas bostandyǵynan aıyrdy.
Apellıatsııalyq saty úkimdi ózgerissiz qaldyrdy. Úkim zańdy kúshine endi.
Eske salsaq, osyǵan deıin Abaı oblysynda alıment tóleýden jaltarǵan eki turǵyn sottalǵany habarlanǵan.