Abaı oblysynyń turǵyny 600 myń teńgege dáriger dıplomyn satyp almaq bolǵan
SEMEI. KAZINFORM - Abaı oblysynda polıtsııa qyzmetkerleri "dıplom alyp beremin" dep aldaǵan alaıaqty ustady.
Polıtsııaǵa Úrjar aýdanynyń 24 jastaǵy turǵyny júgingen. Óz sózinde ol alaıaqtyqtyń qurbany bolǵanyn jetkizdi.
- Tergeý barysynda 44 jastaǵy áıel "medıtsınalyq dıplom alyp beremin" degen jeleýmen jábirlenýshiniń senimine kirip, 600 000 teńge alǵanyn anyqtaldy. Alaıda ýáde etilgen qujat sol kúıi berilmegen, - dep habarlady Abaı oblysy polıtsııa departamentiniń baspasóz qyzmetinen.
Júrgizilgen jedel is-sharalardyń nátıjesinde kúdikti polıtsııa bólimine jetkizildi. Atalǵan fakti boıynsha sotqa deıingi tergeý bastaldy. Kúdikti qolhatpen bosatyldy.
- Qujattardy «jedel» nemese «beıresmı» túrde rásimdeý jónindegi kúmándi usynystar zańǵa qaıshy keledi. Mundaı áreketter qarjylyq shyǵynǵa ǵana emes, qylmystyq jaýapkershilikke de ákelýi múmkin, - dep eskertti polıtseıler.
Eske salsaq, osyǵan deıin alaıaqtyq jasaǵan Qazaqstan azamaty Reseıden ekstradıtsııalanǵany jaıly jazǵanbyz.
