Abaı oblysynyń turǵyndary abattandyrý erejelerin 9 myń ret buzǵan
SEMEI. KAZINFORM – Abaı oblysynyń polıtseıleri tazalyqty saqtamaǵan turǵyndardy jaýapqa tartyp jatyr.
Respýblıkalyq «Taza Qazaqstan» aktsııasy aıasynda jyl basynan beri óńir boıynsha barlyǵy 9 320 quqyq buzýshylyqtyń joly kesilgen. Onyń basym bóligi, ıaǵnı 9 myńǵa jýyǵy – eldi mekenderdi abattandyrý qaǵıdalaryn saqtamaýǵa baılanysty.
Quqyq buzýshylyqtar aýlalarda, kóshelerde, qoǵamdyq oryndar men kópshilik demalatyn aýmaqtarda júrgiziletin reıdter barysynda anyqtalyp jatyr. Olardyń bir bóligi Jedel basqarý ortalyǵyndaǵy beınebaqylaý kameralary arqyly polıtsııa nazaryna ilikken.
– Tazalyq pen qoǵamdyq tártipti saqtaý – árqaısymyzdyń ortaq mindetimiz. Qorshaǵan ortany lastaý jáne abattandyrý talaptaryn buzý ákimshilik jaýapkershilikke ǵana ákelip qoımaı, halyqtyń ómir súrý sapasyna da keri áser etedi. Sondyqtan ár azamatty tazalyq saqtaýǵa, qoǵamdyq oryndarǵa uqypty qaraýǵa jáne belgilengen talaptardy oryndaýǵa shaqyramyz, – dep habarlady Abaı oblystyq polıtsııa departamentinen.
Eske salsaq, osyǵan deıin donor tapsyrǵan qannan ınfektsııa anyqtalǵan jaǵdaıda ne isteý kerektigin jazdyq.
