Abaı oblysynyń polıtseıleri jazǵy kıim úlgisine kóshti
ASTANA. KAZINFORM — Abaı oblysy Polıtsııa departamentinde jeke quram jazǵy kıim úlgisine kóshkenine oraı qyzmetkerlerdiń syrtqy kelbeti men tártibin tekserý maqsatynda keń aýqymdy saptyq tekseris uıymdastyryldy.
Vedomstvo baspasóz qyzmetiniń málim etkenindeı, departament bastyǵy polıtsııa polkovnıgi Eldar Danııarov tekseris barysynda qyzmetkerlerdiń syrtqy kelbeti men minez-qulqynyń ishki ister organdary men qoǵamǵa áserin erekshe atap ótti. Onyń sózinshe, árbir qyzmetker — qoǵamdyq tártip pen zańdylyqtyń tiregi, al olardyń kásibıligi, jaýapkershiligi men uqyptylyǵy — quqyq qorǵaý salasyndaǵy bedeldiń kepili.
— Bizdiń basty mindetimiz — azamattardyń quqyqtary men bostandyqtaryn qorǵaý, zańdylyq pen tártipti saqtaý. Árbir qyzmetker óz syrtqy kelbeti men minez-qulqy arqyly mádenıettiń jáne tártiptiń úlgisin kórsetýi tıis, — dedi polıtsııa polkovnıgi.
Saptyq tekseris barysynda qyzmetkerlerdiń jazǵy kıim úlgisine sáıkestigi, jeke tazalyǵy jáne syrtqy kelbetiniń mádenı normalarǵa úılesimdiligi baǵalandy. Sondaı-aq, birtutas ujymdyq úılesim men kásibı daıyndyqqa da nazar aýdaryldy.
Bul is-sharanyń maqsaty — tártip pen syrtqy kelbet standarttaryn saqtaý, sondaı-aq azamattarmen jumys barysynda polıtsııa qyzmetkerleriniń kásibıligi men senimdiligin arttyrý bolyp tabylady. Abaı oblysy Polıtsııa departamenti árbir qyzmetkerdiń qoǵam aldyndaǵy mindetin joǵary deńgeıde oryndaýyna erekshe mán beredi.
Osyǵan deıin «Taza Qazaqstan» aktsııasy aıasynda Abaı oblysynda 4105 quqyqbuzýshylyqtyń joly kesilgeni belgili boldy.
