Abaı oblysynyń parasportshysy syıaqyny mınıstrlikten sot arqyly óndirip aldy
SEMEI. KAZINFORM – Abaı oblysynda turatyn paraarmrestlıngten álem chempıony halyqaralyq jarystarda jeńip alǵan júldeli oryndary úshin qarastyrylǵan aqshalaı syıaqylardy sot arqyly óndirip aldy.
Abaı oblysy mamandandyrylǵan aýdanaralyq ákimshilik sotynyń málimetinshe, sportshy 2021-2024 jyldar aralyǵynda múmkindigi shekteýli jandar arasynda ótken álem chempıonattarynda júldeli oryndar alǵan. Atalǵan jarystar Býharest, Antalıa, Almaty jáne Kıshınev qalalarynda ótken.
Osy dodalardyń qorytyndysy boıynsha sportshy birneshe márte álem chempıony jáne júldeger atanyp, zańǵa sáıkes memlekettik aqshalaı syıaqy alýy tıis bolǵan.
2025 jyldyń qańtar aıynda sportshy Týrızm jáne sport mınıstrligine tıesili tólemderdi tóleý týraly ótinishpen júgingen. Alaıda vedomstvo qujat tapsyrýdyń belgilengen merzimi ótip ketkenin alǵa tartyp, tólem jasaýdan bas tartqan.
Sot is materıaldaryn zerdeleı kele, bul ýájben kelispedi. Anyqtalǵandaı, mınıstrlik silteme jasaǵan on kúndik merzim sport federatsııalaryna qatysty, al sportshylardyń ózderine qoldanylmaıdy. Sonymen qatar talapker ýákiletti organǵa jeke ózi, belgilengen tártipke saı júgingen.
– Memlekettik organ zańda kózdelgen tólemnen bas tartýǵa quqyly emes. Sot ákimshilik talap-aryzdy qanaǵattandyryp, Týrızm jáne sport mınıstrliginiń bas tartý týraly sheshimin zańsyz dep tanyp, 2021, 2022, 2023 jáne 2024 jyldardaǵy álem chempıonattarynda ıelengen júldeli oryndar úshin aqshalaı syıaqylardy tóleýge mindettedi, - delingen aqparatta.
Sonymen qatar sportshynyń paıdasyna 300 myń teńge kóleminde zańgerlik kómek shyǵyndary óndirildi. Sot sheshimi zańdy kúshine endi.
Eske salsaq, osyǵan deıin Semeıde áskerge shaqyrylǵandardy medıtsınalyq tekserýden ótkizýge 40 mln teńge artyq tólengeni habarlanǵan.