Abaı oblysynyń ormandarynda jabaıy janýarlar qutyrýynyń aldyn alý kúsheıtildi

SEMEI. KAZINFORM — «Semeı ormany» memlekettik orman tabıǵı rezervaty aýmaǵynda jabaıy janýarlar arasynda qutyrý aýrýynyń taralýyna jol bermeý maqsatynda profılaktıkalyq is-sharalar júrgizilip jatyr.

Orman alqabyndaǵy ańdar júretin soqpaqtar boıyna vaktsına salynǵan arnaıy azyqtyq brıketter taratyldy. Immýnızatsııanyń bul ádisi eń aldymen qaýipti vırýstyń negizgi tasymaldaýshylary sanalatyn túlkilerdi, qasqyrlardy jáne janattardy qorǵaýǵa baǵyttalǵan.

— Vaktsına azyqtyq brıkettiń ishinde ornalasqan jáne janýarlar úshin qaýipsiz. Ony jegen kezde ımmýnıtet qalyptasyp, tabıǵı ortada aýrýdyń taralýyn toqtatýǵa múmkindik beredi, — deıdi rezervat ókilderi.

Atalǵan is-sharalardy «Semeı ormanynyń» memlekettik ınspektorlary jáne veterınarııalyq qyzmet mamandary birlesip júrgizip keledi. Immýnızatsııaǵa arnalǵan preparattardy Abaı oblysynyń veterınarııalyq qyzmeti usynǵan.

Sonymen qatar mamandar turǵyndar arasynda da profılaktıkalyq jumystardy kúsheıtti. Aýyldyq okrýgter halqymen kezdesýlerde janýarlardaǵy qutyrýdyń belgileri, jabaıy ańdarmen baılanys kezindegi saqtyq sharalary jáne kúmándi jaǵdaılar týyndaǵan jaǵdaıda der kezinde habarlaý qajettigi eske salyndy.

Eske salsaq, osyǵan deıin Qyrǵyzstanda qońyr aıý popýlıatsııasy artqany habarlanǵan.