Abaı oblysynyń oqýshysy elektr energııasyn óndiretin generator jasady
ASTANA. KAZINFORM – Abaı oblysy Besqaraǵaı aýdany Nurlybek Baımuratov atyndaǵy orta mekteptiń 10-synyp oqýshysy Erasyl Beısengazınov ekologııalyq taza portatıvti generator qurastyrdy.
Jas ónertapqyshtyń aıtýynsha, qurylǵyny paıdalaný úshin ózen nemese úlken sý qoımasy qajet emes, shaǵyn konteınerdegi sý jetkilikti.
Generatordyń jumys prıntsıpi qarapaıym: ydystaǵy sý shaǵyn sorǵy arqyly dóńgelek qalaqtaryna beriledi. Dóńgelek aınalǵan kezde generator iske qosylyp, elektr energııasyn óndiredi. Nátıjesinde turmystyq qajettilikke jaramdy qýat alynady.
— Bul generatordyń basty artyqshylyǵy — aýa raıyna táýelsizdigi. Kún nemese jel elektr stansalary sııaqty tabıǵı jaǵdaıdy kútýdiń qajeti joq. Qurylǵyny kez kelgen jerde ornatyp, qoldanýǵa bolady. Barlyq materıal ekologııalyq taza ári densaýlyqqa zııany joq, — deıdi ónertapqysh oqýshy.
Jobany júzege asyrý barysynda Erasyl qolda bar materıaldardy paıdalanǵan. Dóńgelek eski gramplastınkalardan jasalsa, qalaqshalary plastık bótelke qaqpaqtarynan qurastyrylǵan. Negizgi 12 volttik generator eski prınterden alynyp, sý sorǵysy retinde oıynshyq sý burqaq qozǵaltqyshy qoldanylǵan. Jaryq kózi retinde jaryqdıodty shamdar ornatyldy.
Aldaǵy ýaqytta oqýshy qurylǵyny jetildirip, qýatyn arttyrýdy josparlap otyr. Sondaı-aq generatordy turmystyq tehnıkalardy qosýǵa beıimdeýdi maqsat etedi.
Bul bastama jas ónertapqyshtyń izdenimpazdyǵy men ınjenerlik qabiletin kórsetip qana qoımaı, bolashaqta energııa únemdeýdiń tıimdi joldaryn damytýǵa úles qosýy múmkin.
Aıta ketelik UBT-ny jańa formatqa kóshirý: 2027 jyly jańa joba usynylatyny týraly jazǵan edik.