Abaı oblysynyń oqýshysy baqsha sýaratyn robot oılap tapty
SEMEI. KAZINFORM – Jarma aýdany Georgıevka orta mektebiniń 9-synyp oqýshysy Eraly Qystaýbaı aýyl sharýashylyǵyna arnalǵan erekshe qurylǵy jasap shyqty. Bul týraly Abaı oblysy ákiminiń baspasóz qyzmeti málim etti.
Ol topyraqtyń ylǵaldylyǵyn anyqtap, avtomatty túrde sý jiberetin robot qurastyrdy. Qurylǵy kún energııasynan jumys isteıdi. Onyń quramyna sorǵy, qozǵaltqysh, dóńgelek, akkýmýlıator men basqarý júıesi kiredi.
Jas ónertapqysh aýyl sharýashylyǵynda sýdy únemdeýdi basty maqsat etken. Eralynyń aıtýynsha, robot sýdy únemdeýge, ónimdilikti arttyrýǵa jáne adam eńbegin jeńildetýge múmkindik beredi. Ony jylyjaıda, egistikte nemese baqshada qoldanýǵa bolady.
Joba barysynda ol sensorlardyń jumysyn meńgerip, sýarýdyń tıimdi algorıtmin qurastyrdy, robottyń syzbasy men 3D modelin daıyndady, mıkrokontrollerdi baǵdarlamalap, qurylǵyny qurastyrdy. Jylyjaı men mektep aýlasynda synaqtardan da ótkizip kórgen.
– Maqsatym – tabıǵatty qorǵaý jáne aýyl sharýashylyǵyn zamanaýı tehnologııamen damytý. Bolashaqta mundaı robotty fermerlerge usynsam deımin, — deıdi oqýshy.
Jas ónertapqysh bolashaqta qurylǵysynda JI elementterin damytpaqshy, sondaı-aq aýyl sharýashylyǵyna engizbek oıy bar. Jetekshisi — ınformatıka páni muǵalimi Janar Shaımuratova.
Al buǵan deıin astanalyq oqýshylar kún energııasymen jumys isteıtin eko-sýburqaq oılap tapqan bolatyn.