Abaı oblysynyń kolledji halyqaralyq standart boıynsha mamandar daıarlap jatyr
SEMEI. KAZINFORM – Abaı oblysynyń ákimi Geodezııa, kartografııa jáne qurylys joǵary kolledjiniń jumysymen tanysty.
Abaı oblysynyń ákimi Geodezııa, kartografııa jáne qurylys joǵary kolledjiniń jumysymen tanysty. 1968 jyly paıdalanýǵa berilgen kolledj búginde óńirdegi tehnıkalyq jáne kásiptik bilim berý baǵytynda mamandar daıarlaıtyn irgeli oqý oryndarynyń biri sanalady.
Oqý ornynda zamanaýı tehnologııalar keńinen qoldanylyp, ınnovatsııalyq bilim berý ortalyǵy retinde jumys isteıdi. Kompıýterlik tehnıkamen tolyq jabdyqtalǵan ınformatıka kabınetteri, STEM-zerthana, kolledj stýdııasy stýdentterdiń shyǵarmashylyq áleýetin damytýǵa jáne praktıkalyq daǵdylaryn jetildirýge múmkindik beredi. Oqý kabınetteri stýdentterdiń jan-jaqty damýyna qajetti barlyq talaptarǵa saı jabdyqtalǵan.
Kolledj stýdentteri halyqaralyq deńgeıdegi kásibı jarystarǵa qatysyp keledi. 2024 jyly Frantsııanyń Lıon qalasynda ótken WorldSkills Lyon chempıonatyna, 2025 jyly Danııanyń Hernıng qalasynda ótken EuroSkills Herning chempıonatynda baq synady. Kolledj kásipkerler palatasynyń bastamasymen ótken óńirlik baıqaýda «jumysshy kadrlardy daıarlaıtyn úzdik kolledj» ataǵyn jeńip aldy.
Oqý orny akademııalyq utqyrlyqty damytý baǵytynda Germanııanyń birqatar óndiristik kompanııalarymen memorandýmdarǵa qol qoıdy. 2024–2025 oqý jylynda Qazaqstan boıynsha 22 kelisim men memorandým, sondaı-aq Tájikstan Respýblıkasynyń Dýshanbe qalasyndaǵy ınjenerlik-pedagogıkalyq kolledjben 2 halyqaralyq memorandým jasaldy. Quzyrettilik ortalyǵy halyqaralyq standarttarǵa saı mamandar daıarlaý, WorldSkills chempıonattaryna qatysýshylardy daıyndaý jáne jumysshy mamandyqtaryn nasıhattaý jumystaryn júrgizip keledi.
Bilim ordasynda qazir 1400 stýdent oqyp jatyr. Onyń 300-i jumysshy mamandyqtary boıynsha bilim alyp jatyr.
Oblys ákimi Berik Ýálı kolledjdiń tynys-tirshiligimen tanysyp, oqytýshylarmen, stýdenttermen pikirlesti. Aımaq basshysy stýdentterdiń jumystaryn kórip, tehnıkalyq jáne kásiptik bilim berý júıesiniń óńir úshin mańyzyn atap ótip, bul baǵyttaǵy jumystarǵa qoldaý kórsetý jalǵasatynyn jetkizdi.