Abaı oblysynyń Borodýlıha aýdanynda kirpish zaýyty iske qosyldy
SEMEI. KAZINFORM — Borodýlıha aýdanynyń Novopokrovka aýylynda ornalasqan jańa óndiris ornynyń ashylý rásimine oblys ákimi Berik Ýálı qatysty.
Kásiporyn óńirdegi qurylys kompanııalary men jergilikti turǵyndardy sapaly, ekologııalyq taza jáne básekege qabiletti otandyq qurylys materıaldarymen qamtamasyz etýge baǵyttalǵan. Jobanyń jalpy quny — 2 mlrd teńge. Zaýyttyń jyldyq qýattylyǵy — 6 mıllıon dana keramıkalyq kirpish.
Aımaq basshysy zaýyttyń ashylýy oblys ekonomıkasyna tyń serpin beretinin atap ótti.
— Búgin biz óńirimizdiń óndiristik kelbetiniń jańa taraýyn ashqaly otyrmyz. Memleket basshysy Qasym-Jomart Kemeluly Toqaev bıylǵy Qazaqstan halqyna Joldaýynda «Qazir el ekonomıkasynda reformalar júrgizilip jatyr. Infraqurylymǵa jáne jańa óndiris oryndaryn ashýǵa qomaqty ınvestıtsııa salynyp jatyr. Munyń bári halyqtyń ál-aýqatyn jáne elimizdiń áleýetin arttyrý úshin jasalyp jatqany aıdan anyq» dep óndiristi damytýdyń maqsatyn, ınvestıtsııa tartýdyń mańyzyn aıqyndap bergen bolatyn. Búgin óndirisi iske qosylyp, óńir turǵyndarynyń qajettiligine qyzmet etkeli otyrǵan bul kásiporyn jylyna shamamen 6 000 000 dana kirpish óndirmekshi. Bul oblys jáne aýdan turǵyndarynyń qurylys materıaldaryna tapshylyǵyn azaıtyp, óńir ekonomıkasyna septigin tıgizedi dep oılaımyn. Aýdan ekonomıkasyna úlken qoldaýyn kórsetip, osyndaı aýqymdy jobany júzege asyryp jatqan jeke ınvestor Qaıyrly Hasenovke alǵys aıtamyn. Qazirdiń ózinde 65 adam jumys istep jatyr eken. Elý adam turaqty jumyspen qamtylady. Bul — aýdan halqy úshin úlken kómek. Bıylǵy mamyr aıynda oblystyń damý josparyn jarııalaǵan bolatynbyz. Osy josparǵa sáıkes Semeı qalasynda jańa yqsham aýdan qurýdy qolǵa aldyq. Munda kóptegen jańa qurylys nysandary salynatyn bolady. Kirpish zaýyty qurylys materıaldaryn daıyndaýǵa úlken septigin tıgizedi. Sondyqtan búgin jumysyn bastaǵaly otyrǵan óndiriske sáttilik tileımin, — dedi aımaq basshysy.
«Shyńǵys Tas» JShS basshysy Qaıyrly Hasenovtyń aıtýynsha, zaýyttyń tehnologııalyq protsesi tolyq avtomattandyrylǵan jáne energııa tıimdiligi men tabıǵı resýrstardy utymdy paıdalaný qaǵıdattaryna negizdelgen. Óndiris tsıkly saz balshyqty óndirýden bastap, ony keptirý men kúıdirýge deıingi barlyq kezeńderdi qamtıdy. Ónim sapasy ulttyq standarttarǵa saı joǵary beriktik pen aıazǵa tózimdilikke ıe.
— Qazirgi tańda birqatar kompanııalarmen kóp qabatty turǵyn úıler men mádenıet úılerin salý jóninde kelissóz júrgizilýde. Shyǵys Qazaqstan oblysynan da bizdiń ónimderimizge suranys bar, — dedi ol.
Joba 2024 jyldyń sáýir aıynda bastalyp, 2025 jyldyń qazan aıynda tolyq aıaqtaldy. Nysanda barlyq qurylys-montajdaý jáne iske qosý jumystary júrgizilip, jabdyqtar synaqtan ótti.
