Abaı oblysynyń bes jylǵa arnalǵan tsıfrlyq transformatsııa strategııasy jasalyp jatyr
SEMEI. KAZINFORM – Abaı oblysynda Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn nasıhattaý boıynsha kezdesý ótti.
Oblys ákimi Berik Ýálıdiń tóraǵalyǵymen ótken jıynǵa QR Prezıdentiniń keńesshisi Málik Otarbaev qatysty.
Jıyndy ashqan aımaq basshysy Joldaýdy iske asyrý boıynsha Abaı oblysynda júıeli jumystardyń qolǵa alynyp jatqanyn atap ótti.
«Joldaýdaǵy basym baǵyttardyń biri – tsıfrlandyrý saıasaty aıasynda Abaı oblysynyń 2026-2030 jyldarǵa arnalǵan tsıfrlyq transformatsııa strategııasy jasaqtalýda. Strategııany ázirleýdegi negizgi maqsat – oblysty ınnovatsııalyq jáne tehnologııalyq turǵydan damyǵan aımaqqa aınaldyrý. Jasandy ıntellekti óńirdiń barlyq salalaryna engizý, ınternet ınfraqurylymyn keńeıtý, Smart City jobalaryn engizý, memlekettik qyzmetterdi tolyq onlaın formatqa kóshirý jáne tsıfrlyq bilim men IT-ekojúıeni damytýdy kózdep otyrmyz. Bizdiń maqsat – el Prezıdentiniń tapsyrmalaryn tıimdi oryndap, halyqpen keri baılanysty kúsheıtý, tsıfrlyq qyzmetterdiń qoljetimdiligin arttyrý», - dedi oblys ákimi.
Abaı oblysynda týrızmdi damytýdyń 2025-2027 jyldarǵa arnalǵan Jol kartasy jobasy ázirlendi. Bıyl Abaıdyń 180 jyldyǵyna arnalǵan is-sharalar oblysqa myńdaǵan týrıst tartýǵa múmkindik berdi. Al Alakólde Arbat alańyn jóndeý, jańa qoǵamdyq keńistik salý jáne jaǵalaýdy abattandyrý úshin 658 mln teńge bólindi. 2026 jyly kól aýmaǵyndaǵy jumystar tolyq aıaqtalyp, ózge týrıstik baǵyttardy júıeli damytý jalǵasady.
Prezıdent keńesshisi Málik Otarbaev Joldaýdyń negizgi baǵyttaryn túsindirip, eldiń tsıfrlyq transformatsııasyn júzege asyrýdaǵy jańa tásilder men basymdyqtarǵa nazar aýdardy.
«Joldaý – memlekettik mańyzy bar qujat. Saıası máni de, ıdeologııalyq mańyzy da zor. Prezıdentimiz Joldaýda ekonomıkamyzǵa, saıasatymyzǵa, tutas memlekettik basqarý júıesine qatysty saıası reforma retindegi qujatty halyqqa usyndy. Ásirese álem qaýymdastyǵynyń nazary aýyp otyrǵan jasandy ıntellektini ár salaǵa engizý naqty mindetter júktedi», - dedi ol.
Kezdesýde Borodýlıha aýdanynyń ákimi Aıdar Ibraev pen Jańasemeı aýdany Kókentaý aýyldyq okrýginiń ákimi Ádilet Jumaǵalı sóz sóılep, óz óńirlerinde Joldaýda júktelgen mindetterdi iske asyrý baǵyttary boıynsha atqarylyp jatqan jumystar týraly baıandady.
Aıta keteıik, Abaı oblysynyń Aıagóz aýdanynda 600 oryndyq mektep ashyldy.