Abaı oblysynyń Aıagóz aýdanynda 600 oryndyq mektep ashyldy
SEMEI. KAZINFORM - Búgin Aıagóz qalasynda «Keleshek mektepteri» ulttyq jobasy aıasynda zamanaýı úlgidegi jańa mektep paıdalanýǵa berildi.
Ashylý saltanatyna oblys ákimi Berik Ýálı, QR Oqý-aǵartý mınıstri Juldyz Súleımenova qatysyp, ustazdar, oqýshylar jáne ata-analardy aıtýly oqıǵamen quttyqtady.
-Memleket basshysy Qasym-Jomart Kemeluly Toqaev bilim salasyna, muǵalimderdiń mártebesin kóterýge árdaıym erekshe kóńil bólip keledi. Prezıdenttiń bastamasymen qolǵa alynǵan «Keleshek mektepteri» jobasy aıasynda Abaı oblysynda úsh mektep salyndy. Búgin, mine, sol ıgi bastamanyń jalǵasy retinde Aıagóz qalasynda 600 oryndyq tórtinshi mekteptiń ashylý saltanatyna jınalyp otyrmyz. Oqý-aǵartý mınıstri Juldyz Dosbergenqyzyna jerlesterimizdiń atynan aıryqsha alǵys bildiremiz. Mınıstr retindegi birinshi mektebin osy Abaı elinde ashyp jatqany biz úshin úlken mártebe. Bul mektep Aıagóz qalasyndaǵy mektep tapshylyǵy máselesin sheshýge septigin tıgizedi. Shetkeri aýdan turǵyndaryna arnalǵan, barlyq jaǵdaı jasalǵan zamanaýı bilim ordasy. Prezıdenttiń qoldaýymen ashylyp jatqan mektepte bilim alǵan oqýshylar aldaǵy ýaqytta respýblıkalyq, halyqaralyq olımpıadalarǵa qatysyp, óz múmkindikterin kórsetedi dep oılaımyz. Jańa mektep qutty bolsyn!, – dedi aımaq basshysy.
Oqý-aǵartý mınıstri Juldyz Súleımenova «Keleshek mektepteri» ulttyq jobasy aıasynda ashylǵan mektepterdiń óńirdiń bilim salasyna tyń serpin beretinin atap ótti.
«Halyqaralyq pándik olımpıadalar, ǵylymı joba jarystary boıynsha 20 óńirdiń ishinde Abaı oblysynyń oqýshylary kósh bastap tur. Bul Abaı oblysynyń jas órenderiniń ǵylym men bilimge qushtar ekenin kórsetedi. Aldaǵy ýaqytta bıýdjet múmkindikterine qaraı Aqsýat, Maqanshy, Úrjar aýdandaryna «Keleshek mektepterin» salýdy qarastyratyn bolamyz. Jańa mektep qutty bolsyn! Osy mektepten bilim alǵan oqýshylar elimizdiń erteńine úles qosatyn azamattar bolsyn», - dedi ol.
Oqý-aǵartý mınıstri mekteptiń pándik oqý kabınetterin, zerthanalardy, sport zaldy aralap, oqýshylarmen, muǵalimdermen, ata-analarmen pikirlesti. Mektep oqýshylarynyń ónerin tamashalady. Oblys ákimimen birge mektep aýlasyna aǵash kóshetterin otyrǵyzdy.
Jańa mektep úsh qabatty, zamanaýı talaptarǵa saı salynǵan úsh ǵımarattan turady. Jalpy aýmaǵy 9 992,8 sharshy metr. 600 oqýshyǵa arnalǵan bilim ordasynda 35 oqý kabıneti bar. Onyń ishinde fızıka, hımııa, bıologııa, ınformatıka, STEM jáne robototehnıka zerthanalary tolyq jabdyqtalǵan. Sondaı-aq sport jáne akt zaldary, medıtsınalyq pýnkt, ashana men alǵashqy áskerı daıyndyq kabıneti bar. Mektep jaratylystaný-matematıkalyq baǵytta jumys isteıdi. Munda 42 pedagog qyzmet etedi, olardyń arasynda 10 pedagog-zertteýshi, 8 pedagog-sarapshy jáne 11 pedagog-moderator bar. Oqytý tolyq qazaq tilinde júrgiziledi.
Bul – bıyl Abaı oblysynda «Keleshek mektepteri» jobasy aıasynda ashylǵan tórtinshi bilim ordasy. Buǵan deıin Besqaraǵaı aýdanynda 300 oryndyq, Semeı qalasynyń Qaraǵaıly yqsham aýdanynda 1200 oryndyq, Vodnyı kentinde 600 oryndyq mektepter paıdalanýǵa berilgen bolatyn.
Qazirgi ýaqytta oblys ortalyǵyndaǵy Shyǵys kentinde 300 oryndyq mekteptiń qurylysy júrgizilip jatyr. Sonymen qatar Jarma aýdanynyń Sýyqbulaq aýylynda 100 oryndyq mekteptiń qurylysy bastaldy. Aqsýat aýdanynyń Ekpin aýylynda 300 oryndyq mektep qurylysyna jobalyq-smetalyq qujattama ázirlenip, saraptamaǵa joldanǵan. Sondaı-aq Semeı qalasyndaǵy №11 orta mektepke jańa ǵımarat salý úshin jobalyq qujattar daıyndalýda. Eki nysan da apatty dep tanylǵan bolatyn. Bul jobalar tolyq iske asqanda myńǵa jýyq balanyń sapaly bilim alýyna múmkindik beredi.
