Abaı oblysynyń ákimi týystary men balalarynyń qaıda jumys isteıtinin aıtty

Abaı oblysynyń ákimi Nurlan Uranhaev elordadaǵy eseptik brıfıngte jaqyn týystary men balalarynyń qandaı qyzmette jumys istep jatqanyn aıtyp berdi, dep habarlaıdy Kazinform.

Ortalyq kommýnıkatsııalar qyzmetiniń kýlýarynda óńir ákimi qyzynyń qymbat brend buıymdary týraly áleýmettik jelide taraǵan beınerolıkterge túsinik berdi.

«Meniń qyzym charterlarmen, borttarmen ushpaıdy. Onyń júrgizýshi kýáligi de joq, kólik aıdamaıdy. Máskeý qalasynda turady, 4-kýrsty aıaqtap jatyr. Bir jyldan keıin oqýyn bitirip, sizdiń áriptesińiz bolyp, osynda keledi. Sol kezde ózińiz kórip, óz jaýabyńyzdy alasyz. Meniń qyzym týraly áleýmettik jelide birneshe qyzdyń fotosýreti jarııalanǵan, onyń bireýi ǵana meniń qyzymnyń fotosy, qalǵan sýretter kimdiki, ony kim biledi? Ekinshiden, jańalyq jasaımyn dep bireýdiń balasyn ortaǵa salý durys emes dep oılaımyn. Sizderdiń de balalaryńyz bar shyǵar, áli de bolady. Sizdiń balańyz týraly bireý birdeńe aıtsa ne isteısiz? Men jaýap berýge daıynmyn. Meniń balalarymnyń siz aıtqandaı brendi joq, qarapaıym jumys istep jatyr. Eshqandaı artyq nárse jasamaıdy, araq ishpeıdi, temeki tartpaıdy. Odan basqa ne qosaıyn», - dep jaýap berdi Nurlan Uranhaev tilshi saýalyna.

Sondaı-aq, óńir basshysy memlekettik qyzmetshi retinde jyl saıyn deklaratsııa tapsyratynyn, sonda bári anyq kórsetilgenin atap ótti.

«Eshqandaı týysym tender nemese konkýrstarǵa qatyspaıdy. Qurylys, materıal jetkizý nemese basqa da kommertsııamen eshkim aınalyspaıdy. Meniń týǵan apaıym – ýnıversıtette jumys isteıdi, doktorlyq dárejesi bar. Іnim Astanadaǵy Eýrazııa ulttyq ýnıversıtetinde jumys isteıdi. Úlken ulym memlekettik qyzmette, al kishi ulym – qatardaǵy ınjener bolyp eńbek etedi», - dep túsindirdi Nurlan Uranhaev.

Buǵan deıin Nurlan Uranhaev Aıagózde órt saldarynan tórt balasynan aıyrylǵan otbasyǵa qandaı kómek kórsetilgenin aıtqan edi.