Abaı oblysynyń ákimi Prezıdentke óńirdiń ekonomıkalyq damýy týraly esep berdi
ASTANA. KAZINFORM — Memleket basshysy Abaı oblysynyń ákimi Berik Ýálıdi qabyldady, dep habarlaıdy Aqordanyń baspasóz qyzmeti.
Prezıdentke Abaı oblysynyń 2025 jylǵy áleýmettik-ekonomıkalyq damý qorytyndylary jáne bıylǵy tórt aıdaǵy kórsetkishteri týraly esep berildi.
Berik Ýálıdiń aıtýynsha, ótken jyly óńirlik jalpy ónim kólemi 3,9 trıllıon teńgege jetti. Bıyl qańtar-sáýir aılarynda qysqa merzimdi ekonomıkalyq ındıkator 103,8 paıyzdy qurady. Investıtsııa kólemi 19,4 paıyzǵa ósip, ónerkásip, óńdeý sektory, aýyl sharýashylyǵy, qurylys jáne kólik salalarynda oń dınamıka saqtaldy.
Memleket basshysyna ınvestıtsııa tartý baǵytynda atqarylǵan jumystar jóninde baıandaldy. Byltyrdan bastap jalpy ınvestıtsııalyq pýlǵa kiretin jobalar sany 29-dan 112-ge deıin ulǵaıdy. Tartylatyn ınvestıtsııa kólemi 2,2 trıllıon teńgeden 4,4 trıllıon teńgege deıin artty. Іri ınvestıtsııalyq jobalar qatarynda quny 577,5 mıllıard teńge bolatyn «Aıagóz — Baqty» temirjol jelisiniń qurylysy júrgizilýde. Semeı qalasynda quny 714 mıllıard teńgeni quraıtyn jańa jylý elektr ortalyǵy men jalpy ınvestıtsııa kólemi 255 mıllıard teńge bolatyn taý-ken baıytý kombınatyn salý jobalary júzege asyrylyp jatyr.
Oblys ákimi arnaıy ekonomıkalyq aımaq qurý jumystary týraly da baıandady. Semeı qalasynda josparlanǵan aımaqta jalpy quny 400 mıllıard teńgeni quraıtyn óndiristik jobalardy iske asyrý jáne 2500 jańa jumys ornyn ashý kózdelgen. Úsh iri joba boıynsha usynys kelip tústi.
Qasym-Jomart Toqaevqa Alakól týrıstik aımaǵyn damytý barysy týraly aqparat berildi. Bıyl jaǵalaý ınfraqurylymyn jańǵyrtýǵa 15,4 mıllıard teńge bólingen. Sonyń ishinde elektr jelilerin tartý jáne Úrjar áýejaıynyń termınalyn rekonstrýktsııalaý úshin Arnaýly memlekettik qordan 11,6 mıllıard teńge qarastyrylǵan.
Prezıdentke óńirdegi ınjenerlik ınfraqurylymdy jańǵyrtý baǵytynda qolǵa alynǵan jobalar tanystyryldy. Atap aıtqanda, sýmen jabdyqtaý, káriz jáne jylý jelilerin jańartý, Semeı qalasyndaǵy jańa kópir qurylysyn aıaqtaý, turǵyn úı qurylysy men jol ınfraqurylymyn damytý jumystary baıandaldy.
— Kezdesý sońynda Memleket basshysy óńirge ınvestıtsııa tartý jumystaryn kúsheıtý, ekonomıkany ártaraptandyrý, ınfraqurylymdy jańǵyrtý jáne halyqtyń turmys sapasyn jaqsartý, «Abaıǵa qurmet» aktsııasyn laıyqty deńgeıde júzege asyrý jóninde birqatar naqty tapsyrma berdi, — delingen habarlamada.
Budan buryn Prezıdent Iordanııa Korolin Taqqa otyrǵan kúnimen quttyqtaǵanyn jazǵan edik.
