Abaı oblysynyń ákimi elden shyqqan azamattardy týǵan ólkeni kórkeıtýge atsalysýǵa shaqyrdy
SEMEI. KAZINFORM - Semeıde 19-20 maýsym kúnderi «Týǵan jerge týyńdy tik» atty ınvestıtsııalyq forým ótedi.
Oblys ákimi Berik Ýálı óńir úshin mańyzdy shara qarsańynda aımaqtan shyqqan iri kásipkerler men isker azamattarǵa úndeý joldap, týǵan ólkeni kórkeıtýge atsalysýǵa shaqyrdy.
- Bul – ár azamattyń týǵan topyraǵyna taǵzym jasap, kindik qany tamǵan qasıetti mekenge qurmetin bildirýge tamasha múmkindik. Forým – alysta júrse de, júregi týǵan el dep soqqan jerlesterimizdiń basyn qosatyn, ortaq maqsattar men izgi nıetter toǵysatyn mańyzdy alań. Aldymyzda turǵan mańyzdy mindetterimizdiń biri – óńirimizdiń áleýmettik-ekonomıkalyq áleýetin arttyrý, jańa jumys oryndaryn ashý. Men Sizderdi týǵan jerdiń damýyna óz úlesterińizdi qosýǵa shaqyramyn. Bul – tek qana azamattyq borysh emes, urpaq aldyndaǵy amanat, el bolashaǵyna baǵyttalǵan irgeli qadam, - dedi aımaq basshysy.
Oblys ákimi jaqynda óńirdiń aldaǵy damý josparyn jarııalady. Soǵan sáıkes Semeıde 75 myń turǵynǵa arnalǵan jańa yqshamaýdan salynady.
- Munda turǵyn úı keshenderi, 40-tan astam ákimshilik, kommertsııalyq jáne áleýmettik nysandar, saıabaqtar boı kóteredi. Joba aıasynda bolashaqta jastar saraıy, Jekpe- jek saraıy, ǵalymdar úıi, medıa ortalyq, kórme ortalyǵy, Dostyq úıi, ınvestorlar ortalyǵy, mýzykalyq mektep, fılarmonııa, etnosaıabaq, stadıon, kolledj, mýzeı, balabaqshalar, qonaqúıler men saýda keshenderin salý josparlanyp otyr. Óńirimizdiń órkendeýi jolynda kóp bolyp jumylyp, birlik pen senimdi serik etsek, kez kelgen kúrdeli máseleniń túıinin tarqatýǵa bolady. Oblysty damytýdyń keshendi josparyna shetel ınvestorlaryn tartý baǵyty da qarqyn ala bastady. Sizderdi de aımaqtyń alǵa basýyna birge atsalysýǵa shaqyramyn, - dedi aımaq basshysy.
Osyǵan deıin Berik Ýálı Abaı oblysynyń damý josparyn tanystyrǵan bolatyn.