Abaı oblysynyń ákimi ekobelsendilermen kezdesti
SEMEI. KAZINFORM — Búgin óńirdegi ekobelsendiler Damır Aıdynuly men Kerbez Aıdarbekqyzy oblys ákimi Berik Ýálıdiń qabyldaýynda boldy, dep habarlaıdy Abaı oblysy ákimdiginiń baspasóz qyzmeti.
Aımaq basshysy jastardyń belsendiligi men tabıǵatqa janashyr kózqarasyna rızashylyǵyn bildirip, óńirde ekologııalyq bastamalarǵa árdaıym qoldaý kórsetiletinin atap ótti.
— Sizder óz is-áreketterińiz arqyly úlken nasıhat jasap, eldiń sanasyna oı saldyńyzdar. Buny kóshedegi qoqystardy jınaý ǵana emes, qoǵamǵa qajetti qundylyqtardy dáripteý dep túsinemin. Sondyqtan bul bastamalaryńyz — jastarǵa da, úlkenderge de úlgi. Oblys ákimi retinde sizderdeı azamattarǵa alǵysymdy bildiremin. Biz árdaıym osyndaı belsendi, elge janashyr adamdardy qoldaýǵa daıynbyz. Sizderge tabys etiletin búgingi kishigirim marapat — eńbekterińizdiń laıyqty baǵasy. Aldaǵy ýaqytta da týǵan jerimizdi taza ustaý jolyndaǵy ıgi isterińiz jalǵasyn tabaryna senemin. Birge atqarǵan ár is — berekeli bolmaq. Sizderge rızashylyǵymdy bildirip, alǵys aıtamyn! — dedi Berik Ýálı.
Júzdesý barysynda jastarmen ekologııany saqtaý, tabıǵatty qorǵaý, ekotýrızmdi damytý baǵytynda usynystar aıtylyp, pikir almasyldy.
Memleket basshysy Qasym-Jomart Kemeluly Toqaevtyń bastamasymen qolǵa alynǵan «Taza Qazaqstan» baǵdarlamasy bıyl Abaı oblysynda erekshe qarqynmen júzege asyp keledi. Tazalyq sharalaryna qoǵamdyq baqylaýdy kúsheıtý, turǵyndar arasynda túsindirý jumystaryn júrgizý, arnaıy eskertý taqtaıshalaryn ornatý, zań talaptaryna sáıkes aıyppul salý jáne beınebaqylaý kameralarynyń sanyn arttyrý boıynsha jumystar atqarylýda.
2025 jyldyń 5 sáýirinde bastalǵan sanıtarlyq-ekologııalyq aktsııalarǵa 227,3 myń adam, 10 275 uıym jáne 4114 birlik tehnıka jumyldyryldy. Nátıjesinde 39,3 myń tonna turmystyq qaldyq shyǵaryldy.
Sonymen qatar 132,6 myń aýla, 1939 saıabaq pen gúlzar, 1193 eskertkish tazartylyp, 57 681 túp aǵash pen kóshetter otyrǵyzyldy. Bul baǵyttaǵy jumystar aldaǵy ýaqytta qarqyndy túrde jalǵasatyn bolady.