Abaı oblysynyń 700-den asa turǵyny jeke avtokólik nómirin erkin tańdady

ASTANA. KAZINFORM — Jyl basynan bastap Qazaqstanda avtokólik ıelerine memlekettik tirkeý nómirlik belgileriniń MTNB áriptik-sandyq kombınatsııasyn óz betinshe tańdaýǵa múmkindik beretin jańa tetik iske qosyldy, dep habarlaıdy oblystyq PD baspasóz qyzmeti.

Atalǵan jańa erejeler bıylǵy jyldyń 1 qańtarynan bastap kúshine endi jáne qalaǵan kez kelgen tsıfrlyq ári áriptik belgileri bar memlekettik tirkeý nómirin erkin tańdaýǵa múmkindik beredi. Qyzmetti alý úshin azamattar turǵylyqty jeri boıynsha arnaıy HQKO-ǵa júginýine nemese ekinshi deńgeıli bankterdiń mobıldi qosymshalary arqyly ótinim berýine bolady. Tapsyryspen daıyndalatyn memlekettik nómirlik belgilerdiń quny tańdalǵan kombınatsııaǵa baılanysty 10 AEK — 43 250 teńge jáne 15 AEK — 64 875 teńgeni quraıdy. Al suranysy joǵary nómirlik belgilerge jeke memlekettik baj mólsherlemeleri qarastyrylǵan.

Jeke MTNB 15 jumys kúni merziminde daıyndalady. Abaı oblysy Polıtsııa departamentiniń protsessıng ortalyǵynyń bastyǵy Ádil Begimhanovtyń aıtýynsha, atalǵan qyzmet qazir halyq arasynda turaqty suranysqa ıe.

— Jańa talaptar kúshine engennen beri Abaı oblysy boıynsha tapsyryspen daıyndalatyn memlekettik tirkeý nómirlik belgilerine 768 ótinim qabyldandy. Bul atalǵan tetiktiń ózekti ekenin jáne tsıfrlyq servısterdiń azamattarǵa qyzmetti yńǵaıly ári ashyq túrde alýǵa múmkindik beretinin kórsetedi, — dedi ol.

Budan buryn kóligine «ádemi» nómir alǵysy kelgender sany kúrt artqanyn jazǵanbyz.