Abaı oblysyndaǵy jumyspen qamtý bólimi 1 mlrd teńgeden astam zańbuzýshylyqtarǵa jol bergen
SEMEI. KAZINFORM – Abaı oblysyndaǵy aýdandyq jumyspen qamtý jáne áleýmettik baǵdarlamalar bólimi sot sheshimimen 1 mlrd teńgeden astam qarjylyq zańbuzýshylyqtardy joıýǵa mindetteldi.
Memlekettik aýdıt 2021 jyldan 2024 jyldyń birinshi jartyjyldyǵyna deıingi kezeńdegi bıýdjet qarajatynyń paıdalanylýyna baılanysty tekserý júrgizdi. Sonyń qorytyndysy boıynsha aýdıtorlar júıeli zańbuzýshylyqtardy anyqtady. Atap aıtqanda, memlekettik kelisimsharttar boıynsha kúmándi tólemder jasalyp, qarajatty esepke alý men jumsaýdaǵy kemshilikterge jol berilgen.
Anyqtalǵan derekter qatarynda - oryndalǵan jumystar men kórsetilgen qyzmetterdi rastaıtyn qujattarsyz qarajat aýdarý, eńbekaqy men issapar shyǵyndary boıynsha artyq tólemder, janar-jaǵarmaı materıaldaryn negizsiz esepten shyǵarý jáne memlekettik satyp alý rásimderin aınalyp ótip júrgizilgen satyp alýlar bar.
Aýdıt qorytyndysy boıynsha memlekettik mekemege zańbuzýshylyqtardy joıý jáne qarajatty qaıtarý týraly nusqama berilgen. Alaıda belgilengen merzim uzartylǵanyna qaramastan, bul talaptar tolyq kólemde oryndalmaǵan.
- Nusqamanyń oryndalmaýyna baılanysty Іshki memlekettik aýdıt departamenti sotqa júgindi. Sot talap-aryzdy qanaǵattandyryp, memlekettik mekemege anyqtalǵan kemshilikterdi joıý mindetin júktedi, - dep habarlady Abaı oblysynyń mamandandyrylǵan aýdanaralyq ekonomıkalyq sotynan.
Sot sheshimi zańdy kúshine endi.
Eske salsaq, osyǵan deıin Almatyda múgedektigi bar adamdar úshin 34 myń nysanǵa aýdıt júrgizilgeni habarlanǵan.
