Abaı oblysyndaǵy jańa kombınat eldegi buqtyrylǵan et shyǵaratyn iri kásiporyn bolady
ASTANA. KAZNFORM - Abaı oblysyna jumys sapary barysynda Premer-mınıstrdiń orynbasary – ulttyq ekonomıka mınıstri Serik Jumanǵarın «Eurasia Agro Semey» JShS et óńdeý kesheni qurylysynyń barysymen tanysty. Kásiporyndy bıyl iske qosý josparlanǵan.
Keshen Semeı qalasynan 18 shaqyrym jerde ornalasqan jáne mal qabyldaýdan bastap, shujyq ónimin, jartylaı fabrıkatty, et konservileri men delıkates ónimin shyǵarýǵa deıingi tolyq tsıkldi vertıkaldyq ıntegratsııalanǵan kásiporyn bolyp sanalady. Óndiristik qýaty 100 bas iri qara men jylqyny, sondaı-aq bir aýysymda 1 myń basqa deıin usaq maldy quraıdy. Kásiporynda 250 jańa jumys orny ashylady.
Kompanııa basshylyǵynyń aıtýynsha, jobalyq qýatqa shyqqannan keıin kásiporyn elimizdegi eń iri et óńdeý keshenine aınalady. Onyń turaqty júktemesin qamtamasyz etý úshin zaýyttyń aınalasynda tolyqqandy et klasteri qurylady. Munda fermerlik sharýashylyq, bordaqylaý alańy, jem-shóp ósirýge arnalǵan sýarmaly jer jáne basqa da irgeles óndirister bar.
Jańa kásiporynnyń iske qosylýy Qazaqstannyń et óńdeıtin tarıhı ortalyǵynyń biri retinde Semeıdiń gastronomııalyq dańqyn jandandyrýǵa baǵyttalǵan.
Jobanyń erekshe maqtanyshy Keńes Odaǵy kezinen beri tanymal bolǵan áıgili Semeı buqtyrylǵan etiniń qaıta jandanýy. Bir kezderi Semeı et kombınaty KSRO-nyń iri et ónerkásibi kásiporyny qataryna kirip, ónim sapasy úshin birneshe ret salalyq marapatqa ıe bolǵan edi.
Kásiporyn dırektory atap ótkendeı, jańa óndiriste aty ańyzǵa aınalǵan kombınattyń kadrlyq áleýeti saqtalǵan. Jobany júzege asyrýǵa keńestik jyldary kásiporynda jumys istegen mamandar qatysady. Bul Semeı et óniminiń dańqyn shyǵarǵan dástúrli tehnologııa men retseptti qalpyna keltirýge múmkindik beredi.
Sapar sheńberinde Serik Jumanǵarın sonymen qatar «Qazaq-Astyq Group» JShS munaı ekstraktsııa zaýytyn, «Agrolıder KAZ» JShS burshaq jáne maıly daqyldy qaıta óńdeý kásipornyn jáne oraý óniminiń kóptegen túrin shyǵaratyn «Qazpolıgraf» JShS-ni qosa alǵanda, óńirdiń birqatar qaıta óńdeý kásiporynyn aralady.
Osyǵan deıin Úkimettiń Torǵaı óńirindegi áleýmettik-ekonomıkalyq jobalardy iske asyrýǵa basymdyq bergeni týraly jazdyq.
