Abaı oblysyndaǵy ýchaskelerdiń Quryltaı saılaýyna daıyndyǵy qalaı
SEMEI. KAZINFORM – Abaı oblysynda Quryltaı saılaýynda 401 myńnan astam adam daýys berý quqyǵyna ıe.
Búgingi tańda Abaı oblysynda 464 saılaý ýchaskesi qurylǵan. Onyń ishinde 429 saılaý ýchaskesi azamattardyń tirkelgen turǵylyqty jeri boıynsha, 35 saılaý ýchaskesi turǵyndardyń ýaqytsha bolatyn oryndarynda. Bul týraly Kazinform tilshisiniń saýalhatyna jaýap bergen Abaı oblysy aýmaqtyq saılaý komıssııasynyń tóraǵasy Gúlnara Jigitbaeva málim etti.
Saılaý ýchaskeleriniń eń kóp sany Semeı qalasynda ornalasqan – 127. Kýrchatov qalasynda – 12, Abaı aýdanynda – 13, Aqsýat aýdanynda – 23, Aıagóz aýdanynda – 46, Besqaraǵaı aýdanynda – 32, Borodýlıha aýdanynda – 44, Jarma aýdanynda – 45, Kókpekti aýdanynda – 27, Úrjar aýdanynda – 43, Jańasemeı aýdanynda – 23, Maqanshy aýdanynda – 29 saılaý ýchaskesi jumys isteıdi.
- Óńirde barlyǵy 477 saılaý komıssııasy qurylǵan. Onyń ishinde 1 oblystyq, 12 aýmaqtyq jáne 464 ýchaskelik saılaý komıssııasy jumys isteıdi. Qazirgi ýaqytta saılaý komıssııalary júıesinde 91 aýmaqtyq saılaý komıssııasynyń múshesi jáne 3170 ýchaskelik saılaý komıssııasynyń múshesi bar. Abaı oblysynyń jergilikti atqarýshy organdary usynǵan málimetterge sáıkes, saılaýshylar sany 401 224 adamdy quraıdy, - deıdi Gúlnara Jigitbaeva.
Onyń aıtýynsha, múmkindigi shekteýli adamdar úshin saılaý ýchaskeleriniń qoljetimdiligin qamtamasyz etý saılaý protsesin uıymdastyrýdaǵy basym baǵyttardyń biri. Daýys berý kúni arnaıy jaǵdaılardy qajet etetin saılaýshylardyń sany 2194 adamdy quraıdy. Onyń ishinde 744 adam – kreslo-arbany paıdalanýshylar, 936 adam – zaǵıp jáne kórý qabileti tómen azamattar, 514 adam – estý jáne sóıleý qabileti buzylǵandar.
- Saılaýshylarǵa aqparattyq-konsýltatsııalyq qoldaý kórsetý maqsatynda 13 baılanys ortalyǵynyń jumysy uıymdastyryldy. Onyń ishinde aımaq turǵyndaryna arnalǵan biryńǵaı «109» baılanys ortalyǵy jáne qala men aýdan turǵyndaryna konsýltatsııalyq kómek kórsetetin 12 jergilikti baılanys ortalyǵy jumys isteıdi. Daýys berý kúni oblystyń 162 saılaý ýchaskesinde turǵylyqty jeri boıynsha tirkeýi joq azamattardy tekserý jáne tirkeý jónindegi onlaın-servısterdi paıdalaný josparlanyp otyr. Onyń ishinde 157 onlaın-servıs azamattar týraly málimetterdi jedel tekserýge arnalǵan, al Semeı qalasynda ornalasqan 5 onlaın-servıs turǵylyqty jeri boıynsha tirkeýi joq azamattardy tirkeý úshin qoldanylady, - deıdi Abaı oblysy aýmaqtyq saılaý komıssııasynyń tóraǵasy.
Daýys berý kúni azamattardyń tirkelgen turǵylyqty jeri boıynsha ornalasqan saılaý ýchaskelerinde qosymsha jyljymaly pandýstar ornatylady. Sonymen qatar kólik qoljetimdiligin qamtamasyz etý maqsatynda 29 ınvataksı qyzmeti tartylyp, 5 eldi mekende qosymsha 8 ınvataksı qyzmetiniń jumysy uıymdastyrylady.
- Budan bólek, 2026 jylǵy 23 tamyzdaǵy saılaý kúni múmkindigi shekteýli saılaýshylarǵa jáne júrip-turýy shekteýli azamattarǵa qajetti kómek kórsetý úshin 9 sýrdoaýdarmashy men áleýmettik qyzmetkerlerdi tartý kózdelgen. Oblystyń barlyq saılaýshylary úshin óz saılaý ýchaskesin anyqtaýǵa múmkindik beretin Telegram Bot servısi de qoljetimdi, - deıdi Gúlnara Jigitbaeva.
Eske salsaq, osyǵan deıin Túrkistanda erekshe qajettiligi bar azamattar Quryltaı saılaýynda qalaı daýys beretindigi habarlanǵan.
