Abaı oblysyndaǵy taǵy bir aýylda birneshe úı sý astynda qaldy

SEMEI. KAZINFORM – Abaı oblysy Besqaraǵaı aýdany Qarabas aýylynda birneshe úıdiń aýlasy sý astynda qaldy. 

Besqaraǵaı aýdanynda qar joǵary jyldamdyqpen erip, qyzyl sý júrip jatyr. Qarabas aýylynyń kireberisindegi Nurseıitov jáne Bolnıchnaıa kósheleri boıyna sý jınalǵan.

«Qazirgi ýaqytta Bolnıchnaıa kóshesindegi 4 úıdiń aýlasy sý astynda qaldy. Oqıǵa ornyna jergilikti atqarýshy organ mamandary kelip jetti. Barlyǵy 20 adam jáne 3 tehnıka jumyldyrylyp, sýdy burý maqsatynda ınjenerlik jumystar júrgizilýde. Sonyń nátıjesinde, sý deńgeıi tómendeýde», - dep habarlady Abaı oblysy ákimdiginiń baspasóz qyzmetinen.

Eske salsaq, osyǵan deıin Abaı oblysy Jarma aýdanynda 12 aýla qyzyl sý astynda qalyp, 9 úıge sý kirgeni habarlanǵan.