Abaı oblysyndaǵy shahtanyń opyrylýynan zardap shekken jumysshy Semeıdegi aýrýhanaǵa jetkizildi
SEMEI. KAZINFORM - Abaı oblysyndaǵy Orlov óndiristik kesheninde bolǵan taý jynysynyń opyrylýy saldarynan zardap shekken ekinshi jumysshy Semeıdegi aýrýhanaǵa jetkizildi.
Oblystyq densaýlyq saqtaý basqarmasy baspasóz qyzmetiniń habarlaýynsha, oqıǵadan keıin er adam aldymen Borodýlıha aýdanynyń medıtsınalyq mekemesine jetkizilgen.
- Keıin ony Semeıdegi oblystyq aýrýhanaǵa tasymaldaý týraly sheshim qabyldandy. Qazirgi ýaqytta onyń jaǵdaıy turaqty dep baǵalanyp otyr, - delingen aqparatta.
Dárigerler er adamǵa tıisti medıtsınalyq kómek kórsetip jatyr.
Eske salsaq, Orlov óndiristik kesheniniń shahtasynda taý opyrylyp, úıindi astynda eki jumysshy qalǵan. Olardyń biri oqıǵa ornynda kóz jumdy. Ekinshi jumysshy tabylyp, qajetti medıtsınalyq kómek kórsetý úshin medıtsına qyzmetkerlerine tapsyrylǵany habarlanǵan.
Atalǵan fakti boıynsha qylmystyq is qozǵalyp, oqıǵanyń mán-jaıy anyqtalyp jatyr.
