Qazaqstan azamattarynyń qansha paıyzy AES qurylysyn qoldaıdy – saýalnama nátıjesi
ASTANA. KAZINFORM — «Demokratııa ınstıtýty» qoǵamdyq birlestigi AES qurylysyna qatysty el azamattary arasynda júrgizilgen saýalnama qorytyndysyn jarııa etti.
«QR Prezıdenti janyndaǵy Qazaqstannyń strategııalyq zertteýler ınstıtýtynyń tapsyrysymen «Demokratııa ınstıtýty» 17 tamyz ben 17 qyrkúıek aralyǵynda áleýmettaný zertteýin júrgizdi. Saýalnamaǵa 18 jastan asqan 8 myń respondent qatysty. 21 ǵasyrdan energetıka ekonomıkalyq turaqtylyqqa, qorshaǵan ortaǵa jne adamdardyń ómir súrý sapasyna áser etetin jahandyq damýdyń negizgi faktorlarynyń birine aınaldy. Ýrannyń orasan qoryna Qazaqstan mańyzdy tańdaý — elektr qýaty tapshylyǵy máselesin sheshýdiń joly retinde AES salý máselesin qarastyrýda», — dedi qoǵamdyq birlestik ókili Sandýǵash Qasymseıitova.
Onyń atap ótýinshe, saýalnama júrgizilgen kezde respondentterdiń jalpy sanynyń 59,2 paıyzy daýys berýge qatysýǵa daıyn ekenin bildirdi. Sonymen qatar 41,6 paıyzy daýys berýge qatysýǵa naqty nıet tanytyp otyr.
«Árbir besinshi respondent áli túpkilikti sheshim qabyldaǵan joq, al 17 paıyzy referendýmǵa múldem qatyspaıtynyn atap ótti», — dedi ol.
Birlestik ókiliniń dereginshe, jalpy, qazaqstandyqtardyń 60,2 paıyzy Qazaqstanda atom elektr stansasyn salý ıdeıasyna oń kózqaras bildirgen. Onyń 38,6 paıyzy oń, 21,6 paıyzy birshama oń kózqarasta. Munyń aldynda tamyzda júrgizilgen saýalnamamen salystyrǵanda AES salý ıdeıasyn qoldaýshylar sany 53,1 paıyzdan 60,2 paıyzǵa ósti.
«Alynǵan qorytyndylar Úkimet, sarapshylar jáne qoǵam arasyndaǵy ashyq dıalogtyń mańyzdylyǵyn kórsetedi. Atom elektr stansasynyń qurylysy — tek tehnıkalyq ǵana emes, sonymen qatar azamattardyń belsendi qatysýyn talap etetin áleýmettik joba», — dedi Sandýǵash Qasymseıitova.
