Abaı oblysyndaǵy órtti 300-ge jýyq adam sóndirip jatyr
ASTANA. KAZINFORM – Abaı oblysy Aıagóz aýdanyndaǵy taýly, jetýi qıyn jerde qurǵaq shóp órtenip jatyr. Órtti sóndirýge 300-ge jýyq adam men 50-den astam tehnıka jumyldyryldy, dep habarlaıdy Kazinform tilshisi.
Órt 11 qyrkúıekte saǵat 12:35-te Myńbulaq aýyldyq okrýgindegi Arasan ýchaskesinde shyqqan. Aldyn ala málimet boıynsha, tilsiz jaý shamamen 700 gektar aýmaqqa taraǵan. Qazir taýly jerde jekelegen oshaqtar qalyp, órt tolyq sóndirilgen joq.
Órtti sóndirýge TJM-nyń 123 qyzmetkeri men 32 tehnıkasy, jergilikti atqarýshy organdardyń 120 qyzmetkeri men 20 tehnıkasy, sondaı-aq orman sharýashylyǵynyń 20 mamany men úsh tehnıkasy jumyldyrylǵan. Eldi mekenderge qaýip tónip turǵan joq.
Bul – Aıagóz aýdanyndaǵy sońǵy birneshe kúndegi ekinshi iri órt. 10 qyrkúıekte Tarbaǵataı aýyldyq okrýginiń Qazankemir ýchaskesinde 200 gektar jerdi qurǵaq shóp órtegen. Ol órt 11 qyrkúıekte saǵat 12:20-da tolyq sóndirilgen. 15 mınýttan keıin Arasan ýchaskesinde jańa órt shyqqany týraly habar túsken.
Qazirgi tańda negizgi kúshter ekinshi órtti sóndirýge baǵyttalǵan. Jumysty taýly ári jetýi qıyn jer bederi qıyndatyp otyr.
Aıta keteıik, keshe elimizdiń bes óńirinde orman órti tirkeldi.
Sondaı-aq Ertis ózeniniń jaıylmasy órtenip jatqanyn jazdyq.
