Abaı oblysyndaǵy mektepterde myńǵa jýyq synyp onlaın oqýǵa kóshirildi

ÓSKEMEN. KAZINFORM - Abaı oblysynda maýsymdyq aýrýlardyń órshýine baılanysty qashyqtan bilim alyp jatqan oqýshylar sany artyp keledi.

Oblystyq Bilim basqarmasy usynǵan málimetke sáıkes, qazirgi ýaqytta 992 synyptyń 18 234 oqýshysy onlaın formatta oqyp jatyr.

- Qashyqtan oqytýǵa kóshirý sheshimi tek naqty jaǵdaıǵa qaraı, qajettilik týyndaǵan synyptarda ǵana qabyldanady. Tek synyptaǵy oqýshylardyń 30 paıyzdan astamy densaýlyq jaǵdaıyna baılanysty sabaqqa qatyspaǵan jaǵdaıda ǵana balalar mektepke kelmeıdi. Qazirgi ýaqytta 415 bastaýysh synyptary onlaın oqýda, bul - 6 692 oqýshy. Sondaı-aq 5-11 synyptardaǵy 577 synyp qashyqtan bilim alyp jatyr, - delingen aqparatta.

Qashyqtan oqıtyn oqýshylardyń eń kóp sany Semeı qalasynda tirkelgen - 11 481 bala. Aıagóz aýdanynda - 3 695, Besqaraǵaı aýdanynda - 1 268, Janasemeıde - 565, Abaı aýdanynda 394 oqýshy onlaın oqýǵa aýystyrylǵan.

Soǵan qaramastan, oqý protsesi úzdiksiz jalǵasyp keledi. Mektepter onlaın oqytý quraldaryn paıdalanyp, oqý baǵdarlamasyn tolyq kólemde oryndap jatyr.

Eske salsaq, osyǵan deıin ShQO-da JRVI juqtyrǵandar sany 45 myńnan asqany habarlanǵan.