Abaı oblysyndaǵy kreatıvti ındýstrııa parkinde sán zaly ashyldy
SEMEI. KAZINFORM – Abaı oblysyndaǵy kreatıvti ındýstrııa parkinde sán zalynyń ashylý ótti. Oblystaǵy kreatıvti ındýstrııa parki óziniń jumys aıasyn keńeıtip keledi. Bul óńirdegi shyǵarmashylyq salanyń damýyna tyń serpin bermek. Búgin aımaq basshysy Nurlan Uranhaev sonda arnaıy baryp, iske asyrylǵan jobalarmen tanysty.
«Alańda «Brilliant» shyǵarmashylyq mektebiniń negizin qalaýshy Mádına Edilbekovanyń jetekshiligimen uıymdastyrylǵan sán kórmesiniń ashylýy ótti. Ol jergilikti dızaınerlerge shyǵarmashylyq damý men keń múmkindikterge jol ashady. Sonymen qatar ol túrli stıldegi dızaınerlerdi biriktiretin alań bolmaq. Bul jerde olarǵa óz ónimderin satyp qana qoımaı, ıdeıa almasýǵa, yntymaqtastyq qurýǵa jáne túrli sharalar uıymdastyrýǵa múmkindik týmaq», - dep habarlady Abaı oblysy ákimdiginen.
Budan bólek, parkte «Talk like» oqyrmandar klýbynyń alǵashqy kezdesýi ótti. Joba qazaq tarıhy men mádenıetin jańǵyrtyp, ulttyń baı murasyn bolashaq urpaqqa usynady. Munda oqyrman klýby, jazýshylar klýby jáne qıssa-dastandar klýby jumys isteıdi.
«Munda sonymen qatar «Oısalar talks» podkastynyń túsirilimi ótkizilip, spıkerler men kreatıvti ındýstrııa ókilderi osy baǵytty damytý boıynsha óz tájirıbeleri men ıdeıalarymen bólisti. Kreatıvti ındýstrııa parkin aralaǵan oblys ákimi jobalardy odan ári jetildirý úshin jergilikti atqarýshy organdar tarapynan tıisti qoldaý kórsetiletinin atap ótti», - delingen aqparatta.
Aıta keteıik, kreatıvti ındýstrııa parki – óńirdiń shyǵarmashylyq adamdaryn ortaq maqsat pen kreatıvti ekonomıkany damytý jáne óńirdegi ınnovatsııalardy yntalandyrýǵa biriktirýge arnalǵan platforma.
