Abaı oblysyndaǵy kolonııada sottalǵandarǵa arnalǵan onlaın dúken iske qosyldy
ASTANA. KAZINFORM — Semeıde qaýipsizdigi barynsha joǵary mekeme sottalǵandary úshin onlaın dúken ashty, dep habarlaıdy QR ІІM Qylmystyq-atqarý júıesi komıtetiniń baspasóz qyzmeti.
Abaı oblysyndaǵy qaýipsizdigi barynsha joǵary túzeý mekemesinde sottalǵandardyń azyq-túlik pen alǵashqy qajettiliktegi zattarǵa arnaıy termınaldar arqyly tapsyrys berýine múmkindik beretin onlaın-dúken jumysyn bastady. Elektrondy dúken — jabyq tsıfrlyq júıe. Onda sottalǵandar ruqsat etilgen taýar sanattaryn tańdap, qajetti ónimderdi rásimdeı alady: azyq-túlik, gıgıena quraldary, turmystyq buıymdar jáne keńse taýarlary. Tapsyrys termınal arqyly berilgennen keıin dúken qyzmetkerleri taýardy jınaqtap, mekemege jetkizedi. Barlyq ónimder mindetti túrde tekseristen ótedi.
— Bizdiń maqsatymyz — ár operatsııa tirkeletin, jeńil ári ashyq júıeni qalyptastyrý. Alǵashqy tapsyrystar qabyldanyp, sottalǵandarǵa jetkizildi. Bul — olardyń kúndelikti qajettilikterin yńǵaıly ári qoljetimdi túrde óteýge arnalǵan servıs. Assortımentti de udaıy keńeıtip otyramyz, — dedi jeke kásipker Batyrbek Ámirhanov.
Sottalǵandar da jańa júıeniń tıimdiligin atap ótip jatyr.
— Maǵan báriniń ádil ári túsinikti júrgiziletini unaıdy: baǵa naqty kórsetilgen, qorytyndy soma birden shyǵady. Interfeıs qarapaıym, tehnologııany jaqsy meńgermegenderge de ońaı. Balansty naqty ýaqyt tártibinde baqylaýǵa bolady. Mundaı servısterdiń engizilýi penıtentsıarlyq júıeni jańǵyrtyp, protsesterdi qyzmetkerler men sottalǵandar úshin barynsha ashyq etedi, — dedi sottalǵandardyń biri.
Mekeme ókilderi de elektrondy dúkenniń jumys tıimdiligin erekshe atap ótti.
— Elektrondy dúken sottalǵandardy qajetti taýarlarmen qamtamasyz etý protsesin aıtarlyqtaı júıeledi. Qaǵaz tizimder men qolmen tekserýlerdiń qajeti bolmaı qaldy. Tsıfrlandyrý — tıimdi jáne ashyq jumysqa bastaıtyn jol, — dedi Aıdyn Kalelov.
Budan buryn Aqtóbede kolonııaǵa tyıym salynǵan zattardy kirgizbek bolǵan turǵyn ustalǵanyn jazǵan edik.