Abaı oblysyndaǵy forýmǵa ınvestorlar qandaı syılyq alyp keldi
SEMEI. KAZINFORM – Semeıde bıznesmenderdiń erekshe qyzyǵýshylyǵyn týǵyzǵan «Týǵan jerge týyńdy tik» atty ınvestıtsııalyq forým ótti. Іs-sharaǵa Abaı oblysy úshin aýqymdy áleýmettik jáne ınfraqurylymdyq jobalar daıyndaǵan kásipkerler men ınvestorlar jınaldy.
Forým Abaı oblysy men Qazaqstannyń basqa da aımaqtary men seriktes memleketter arasyndaǵy baılanysty nyǵaıtý alańyna aınaldy. Shara ótkizilgen basty meken – «Abaı Arena» qatysýshylardy jergilikti taýar óndirýshilerdiń kórmesimen qarsy aldy. Munda azyq-túlik, kıimderden bastap avtobýs pen arnaıy tehnıkaǵa deıin kórýge bolady. Otandyq kompanııalar belsendi jumys istep, óndiristik jelini keńeıtýde. Olardyń basym bóligi ınvestıtsııalyq jobalardyń ashylýy nemese keńeıýimen baılanysty.
Qyzyl kilemde júrip ótken 500-ge jýyq forým qatysýshysy arasynda Qazaqstan men sheteldik bıznesmender men ınvestorlar, Parlament depýtattary, qoǵam qaıratkerleri boldy. Bıznes-qaýymdastyq oblystyń paıdaly tájirıbelerimen tanysyp, birlese jumys isteý múmkindikterin talqylady. Forým qorytyndysy boıynsha ózara yntymaqtastyq jaıly 14 memorandýmǵa qol qoıyldy.
Aımaqtyń mańyzdy basymdyqtarynyń biri – geografııalyq ornalasý jaǵdaıy. Oblys Qytaı, Reseı men Ortalyq Azııany baılanystyrady.
Búginde Abaı oblysy jalpy quny 2,7 trln teńgeni quraıtyn jáne 8 myń jumys ornyn ashýǵa múmkindik beretin, áleýeti joǵary 38 ınvestıtsııalyq jobany toptastyrdy. Olardyń qatarynda zaýyttar, servıstik keshender, saýda úıleri, qaıta óńdeý kásiporyndary bar. Eń aýqymdy jobalardyń biri 22 myń adamǵa arnalǵan stadıon qurylysy. Bul áleýmettik baǵyttaǵy joba KAZ Minerals Tobynyń aımaqty qoldaý baǵdarlamasy aıasynda birlese qarjylandyrýymen júzege asyrylmaq.
Forýmnyń plenarlyq otyrysynda sóılegen «KAZ Minerals Management» JShS basqarma tóraǵasy Eldar Mamedov kompanııanyń oblys tirshiligine kóp jyl boıy aralasyp kele jatqanyna toqtaldy. Igi ister qatarynda – aýrýhanalardy jóndeý, jataqhana salý, mádenı jáne sporttyq jobalardy qoldaý bar. Kolledjdermen yntymaqtasý arqyly stýdentterge grant bólý, olardyń tájirıbeden ótýine erekshe kóńil bólinedi.
– Búgin qol qoıylǵan memorandým – KAZ Minerals Tobynyń bizdiń ESG-ustanymdarymyzdyń aıasynda Abaı oblysyndaǵy ómir sapasyn jaqsartýdaǵy kezekti qadamymyz. Semeıdegi stadıon qurylysy – bizdiń sporttyq ınfraqurylym salasyndaǵy aýqymdy jobalarymyzdyń biri. Sol arqyly sportty damytyp qana qoımaı, qalanyń belsendi, ári mádenı ómirine úles qosyp kelemiz. Biz bul tarıhı sáttiń bólshegi bolǵanymyzǵa rızamyz, – dedi Eldar Mamedov.
Byltyr KAZ Minerals Toby № 50 zamanaýı IT-lıtseıiniń qurylysy jobasyn júzege asyrdy. Atalǵan oqý orny eldegi eń ozyq mektepterdiń biri atanyp, «Altyn Gefest» konkýrsynda jyldyń úzdik áleýmettik jobasy ataǵyn jeńip aldy.