Abaı oblysyndaǵy evakýatsııalanǵan aýylda polıtsııa tártipti qamtamasyz etip jatyr
SEMEI. KAZINFORM — Abaı oblysynyń Prırechnoe aýylynda iri órttiń saldaryn joıý jumystary jalǵasýda. Oǵan polıtsııa da tartyldy.
Jaǵdaı jedel qyzmetterdiń erekshe baqylaýynda tur.
Zardap shekken aımaqta táýlik boıy polıtsııa qyzmetkerleri jumys isteıdi. Olar qoǵamdyq tártipti saqtaýmen qatar evakýatsııalanǵan turǵyn úılerge baqylaý ornatqan. Bul – maroderlik oqıǵalarǵa jol bermeý jáne japa shekkenderdiń múlkin saqtaý maqsatynda qabyldanǵan sharalar.
— Tótenshe jaǵdaılar departamenti jáne ózge de shuǵyl qyzmettermen ózara is-qımyl kúsheıtilgen rejımde júzege asyrylyp jatyr. Basty maqsat — azamattardyń qaýipsizdigin qamtamasyz etip, quqyq buzýshylyqtardyń aldyn alý, — dep málimdedi Abaı oblysy polıtsııa departamenti.
Quqyq qorǵaý organdary sondaı-aq turǵyndarǵa sabyr saqtap, qutqarýshylardyń nusqaýlaryn qatań ustaný qajettigin eske salady.
Buǵan deıin habarlanǵandaı, Abaı oblysynda dala órtine baılanysty tutas bir aýyldy kóshirýge týra keldi.
Jalyn jeke turǵyn úılerge taraǵan. Kúshti jel men qoıý tútin saldarynan ondaǵan otbasy evakýatsııalandy.
Órt sóndirý jumystary jalǵasyp jatyr. Oqıǵa ornynda 100-den astam adam, arnaıy tehnıka men TJM tikushaǵy jumyldyrylǵan.