Abaı oblysyndaǵy Ertis ózeniniń deńgeıi kóteriledi – qutqarýshylar halyqqa eskertý jasady

SEMEI. KAZINFORM – Abaı oblysynda Ertis ózeniniń deńgeıi kóterilse jaǵalaýda demalyp jatqan adamdarǵa qaýip tónýi múmkin.

Oblystyq Tótenshe jaǵdaılar departamenti baspasóz qyzmetiniń málimetine súıensek, Shúlbi sý qoımasyna aǵynnyń ulǵaıýyna baılanysty Ertis ózenindegi sý deńgeıi kóteriledi. 

- 14 tamyzdan bastap Shúlbi SES-ten Ertis ózenine sý aǵyzý kólemi 860 m3/s deıin ulǵaıtylady. Osydan keıin ózende sý deńgeıi kóterilip, aǵyn kúsheıip, sý temperatýrasy tómendeıdi. Bul jaǵalaýda nemese sýdyń janynda demalyp jatqan halyqqa qaýip tóndirýi múmkin, - delingen aqparatta. 

Osyǵan baılanysty qutqarýshylar turǵyndarǵa jabdyqtalmaǵan jerlerde shomylýǵa bolmaıtynyn, aǵyny qatty sýǵa túspeýdi, balalardy sýdyń janynda únemi baqylap júrýdi eskertti. 

Eske salsaq, osyǵan deıin Ertis boıynyń topyraǵy tozyp bara jatqany jaıly jazǵanbyz.