Abaı oblysyndaǵy aýyl mańynda aıý júr — turǵyndarǵa eskertý jasaldy
SEMEI. KAZINFORM — Áleýmettik jeliler men messendjerlerde Abaı oblysy Aqsýat aýdanyndaǵy Ekpin aýyly aýmaǵynda aıý júrgeni týraly vıdeo tarady. Osyǵan oraı Kazinform tilshisi joldaǵan saýalhatqa Aqsýat aýdany ákiminiń mindetin atqarýshy Ahmet Aqqazın jaýap berdi.
— Aıý júrgen vıdeonyń Ekpin aýylyna qarasty egistik alqabynda túsirilgeni rastaldy. Bul alqap Ekpin aýylynan ońtústik batysqa qaraı 12 shaqyrym jerde ornalasqan. Sol jerde basqada nysandar ornalaspaǵan, — deıdi ol.
Belgili bolǵandaı, túz taǵysyn jońyshqa sýǵaryp júrgen sýshylar kórgen. Oqıǵa ornyna Abaı oblysy tabıǵı resýrstar jáne tabıǵat paıdalanýdy retteý basqarmasyna qarasty «Orman jáne ańshylyq sharýashylyǵynyń jedel den qoıý jasaǵy» KMM Aqsýat aýdany boıynsha aǵa ınspektory barǵan. Alaıda ol jetken kezde aıý taýǵa kirip ketken.
— Osylaısha, aıý tabıǵı mekendeý ortasyna qaraı baǵyt alyp ketti. Aýyl turǵyndaryna taýly aımaqta túngi ýaqytta jaıaý beısaýat júrmeý kerektigi týraly túsindirý jumystary júrgizildi. Qazirgi tańda jaǵdaı turaqty, — deıdi Ahmet Aqqazın.
Taýly aımaqtan kelgen aıý aýyl mańyna jaqyn jerde buryn-sońdy júrmegen eken. Aqsýat aýdany ákiminiń mindetin atqarýshy lagerlerge, týrısterge jáne jergilikti turǵyndarǵa eshqandaı qaýip tónip turǵan joqtyǵyn málim etti.
Eske salsaq, osyǵan deıin Kólsaı ulttyq parkinde qońyr aıý baıqalǵany habarlanǵan.
