Abaı oblysyndaǵy «Abaı-Shákárim» kesenesi aýmaǵynda «Etno aýyl Jıdebaı» kesheni boı kótermek
SEMEI. KAZINFORM - Abaı oblysynyń ákimi Berik Ýálı Abaı aýdany Qaraýyl aýylynda ótip jatqan «Abaı kúni» merekesinde «Abaı-Shákárim» kesenesi aýmaǵynda «Etno aýyl Jıdebaı» kesheni salynatyndyǵyn jetkizdi.
- Abaı aýdanynyń týmasy, metsenat Bektas Medǵatovtyń bastamasymen júzege asatyn, 60 gektar aýmaqty qamtıtyn keshen óńirdegi týrızmdi damytyp, rýhanı-mádenı murany dáriptep, Jıdebaıdy halyqaralyq týrıstik baǵyttardyń birine aınaldyrady. Sonymen qatar Jıdebaı men Bórilide antenna-dińgekti qurylǵy ornatylyp, ınernet qosylady. Osylaısha, Abaı toıy qarsańynda Abaı aýdany 100 paıyz ınternetpen qamtyldy, - dedi Berik Ýálı.
Onyń aıtýynsha, oblystyq bıýdjet esebinen júzege asatyn bul jumys týrıster eń kóp keletin qasıetti orynnyń ǵana emes, aýdan jurtshylyǵynyń qajettiligin ótep, el ıgiligi úshin qyzmet etetin bolady.
- Sondaı-aq Abaı murasyn tolyq bir ınternet platformaǵa jınaqtap, osy kezge deıingi Abaıtanýdyń barlyq qazynalary men Abaı tóńiregindegi barlyq málimetterdi toptastyrǵan «Abaı akademııasy» portaly iske qosyldy. Bul izdenýshiler úshin eń aýqymdy akademııalyq alań bolmaq. Bular kóptegen mádenı is-sharalar men saltanatty keshterden, hakim qurmetine shyǵyp jatqan kitaptar men ǵylymı konferentsııalardan bólek atqarylyp jatqan sharýalardyń bir parasy ǵana.
Qysqasy, Abaıdyń murasy – ulttyq órkenıetimizdiń eń bıik shyńy. Ádebıet, teatr, kıno, mýzyka, beıneleý óneri bári de Abaı rýhynda jańa bıikke kóterilýi tıis. Abaı ıdeıalaryn únemi zamanaýı platformalarda nasıhattaý - bizdiń mindetimiz. Búgingi urpaq hakimniń mereıli datasyn toılap qana qoımaı, onyń ıdeıalaryn iske asyrýǵa, ony ómir súrý daǵdysyna aınaldyrýǵa umtylýy kerek. Sonda ǵana bul toı naǵyz el mereıi bolmaq. Áıgili ıspan ǵalymy, kezindegi ıÝNESKO bas dırektory Federıko Maıor «Abaı – zamanalar esimin óshire almaıtyn dana» degen edi. Iá, Shyńǵystaýdyń baýyrynda týyp, danalyqtyń shyńyna shyqqan hakim Abaıdyń esimin eshqandaı ýaqyt daýyly, zaman quıyny óshire almaıdy, - dedi Abaı oblysynyń ákimi.
Óz sózinde ol Abaıdyń rýhy qazaq halqynyń órkenıetiniń ózegi, bizdiń damýymyzdyń qozǵaýshy kúshi bolyp qala beretindigin jetkizdi.
Eske salsaq, osyǵan deıin Berik Ýálıdiń Abaı toıynda óńirge jasalǵan eń basty syılyq – «Abaıǵa qurmet» aktsııasy ekendigi jaıly aıtqanyn jazǵanbyz.