Abaı oblysyndaǵy 6 aýdan sý basý qaýpi joǵary aýmaqta tur

SEMEI. KAZINFORM — Abaı oblysyndaǵy Aqsýat, Aıagóz, Besqaraǵaı, Borodýlıha, Jarma jáne Kókpekti aýdandary sý basý qaýpi joǵary aýmaqta tur.

«Qazgıdromet» RMK Abaı oblysy boıynsha fılıalynyń málimetinshe, búgingi tańda Aqsýat, Aıagóz, Abaı, Jarma, Borodýlıha, Besqaraǵaı, Kókpekti aýdandary men Semeı qalasynda qar qory mol jınalǵan. 

— Jazyq jerlerde qardyń qalyńdyǵy 2-55 sm aralyǵynda. Birqatar aýdanda topyraqtyń tońy 105-136 sm-ge jetken. Mamandar Aqsýat, Aıagóz, Besqaraǵaı, Borodýlıha, Jarma jáne Kókpekti aýdandaryn sý basý qaýpi joǵary aýmaqtarǵa jatqyzyp otyr. Kúnniń kúrt jylynýy, jańbyr nemese qardyń jaýýy ózenderde muz keptelisin týyndatyp, shaǵyn ózender men ýaqytsha sý arnalary arqyly sý tasqyny qaýpin arttyrýy yqtımal, — delingen aqparatta.

Abaı oblysy aýmaǵyndaǵy jergilikti mańyzy bar avtokólik joldarynyń jalpy uzyndyǵy 4 462 shaqyrymdy quraıdy. Jol boıynda 162 kópir jáne 1 745 sý ótkizý qubyry ornalasqan.

— Sondaı-aq óńirdegi jalpy uzyndyǵy 733 shaqyrym temirjol jelisiniń boıynda 265 kópir jáne 330 sý ótkizý qubyry bar. Qazirgi ýaqytta jergilikti mańyzy bar kólik jáne temirjoldardaǵy sý ótkizý qubyrlary qardan tazartylyp jatyr. Oblys aýmaǵyndaǵy eldi mekenderden 300 myń tekshe metrden astam qar shyǵarylǵan, — dep habarlady oblys ákimdiginen.

Ótken jyldardaǵy sý tasqyny kezeńderiniń qorytyndysy negizinde oblystyq mańyzy bar avtomobıl joldarynda 9 ýchaske jáne aýdandyq mańyzy bar joldarda 10 ýchaske sý ótý qaýpi joǵary aımaq retinde anyqtaldy. Atalǵan aýmaqtar erekshe baqylaýǵa alynǵan.

Eske salsaq, osyǵan deıin ShQO-da sý tasqyny kezeńine joǵary daıyndyq rejımi engizilgeni habarlanǵan.