Abaı oblysyndaǵy 127 aýyl mektebi Starlink ınternetine qosyldy

ASTANA. KAZINFORM – Abaı oblysynda aýyldardaǵy 127 mektep Ilon Masktyń Starlink ınternetine qosylǵan.

Óńirdegi mektepterdiń 75 paıyzy aýyldarda ornalasqan. Memleket pen qaıyrymdylyq qorlarynyń qoldaýymen tirek mektepter jobasy júzege asyrylyp jatyr.

Búginde oblystaǵy bilim ordalarynyń 7-i tirek mektepke aınaldy. Bul mektepterge qomaqty qarjy bólinip, materıaldyq-tehnıkalyq baza jańartyldy. Atap aıtqanda, STEM, tehnologııa, fızıka, hımııa, ınformatıka, bıologııa quraldarymen qamtylǵan arnaıy kabınetter, zerthanalar men sporttyq ınventarlar, ınteraktıvti paneldermen jabdyqtaldy.

- Qazandyqtardy aýystyrý, sýmen jabdyqtaýdy jaqsartý, ınternet jyldamdyǵyn arttyrý syndy ınfraqurylymdyq jumystar atqaryldy. Oblystyń shalǵaıyndaǵy 127 mektepke «Starlink» spýtnıktik ınterneti qosyldy. Bul pedagogter men oqýshylardy joǵary jyldamdyqty ınternetpen qamtamasyz etýge múmkindik berdi, - deıdi bilim basqarmasynyń basshysy Nurjan Ahmetqalıev.

Aýyl pedagogterimen jumys jobalaý keńsesi jáne ádistemelik qoldaý arqyly júrgiziledi. 22 ádisker-mentor arnaıy oqytýdan ótti. Pedagogterge keńes berý úshin call-ortalyq ta qurylǵan.

Eske salsaq, osyǵan deıin Abaı oblysyndaǵy kúzgi jıyn-terinniń kórsetkishteri habarlanǵan.