Abaı oblysynda joldardy kútip-ustaý talaptaryn buzǵan 12 laýazymdy tulǵa jaýapqa tartyldy

SEMEI. KAZINFORM – Abaı oblysynda joldardy kútip-ustaý talaptaryn buzǵan 12 laýazymdy jáne 20 zańdy tulǵa ákimshilik jaýapkershilikke tartyldy.

Oblystyq polıtsııa departamenti baspasóz qyzmetiniń málimetine súıensek, qys bastalǵaly beri tártip saqshylary óńir aýmaǵynda joldardy tekserip, anyqtalǵan buzýshylyqtardy joıý jumystaryn júrgizip jatyr. 

- Barlyǵy 20 000 shaqyrymnan astam jol tekserildi. Jol jaǵdaıyna qatysty ártúrli kemshilikter anyqtalǵan. Sonyń nátıjesinde jolǵa jaýaptylarǵa kútip-ustaý jáne qaýipsizdik talaptaryn buzǵandyqtary jóninde 132 nusqama jiberildi, - delingen aqparatta. 

Osylaısha, 12 laýazymdy jáne 20 zańdy tulǵa ákimshilik jaýapkershilikke tartyldy.

- Tekserýlerden soń shamamen 8 780 tekshe metr qar shyǵaryldy. Bul sharalar jol qozǵalysynyń qatysýshylary úshin qaýipsiz jaǵdaılardy qamtamasyz etýge jáne óńirde jol-kólik oqıǵalarynyń aldyn alýǵa baǵyttalǵan, - delingen habarlamada. 

Eske salsaq, osyǵan deıin Omby-Maıqapshaǵaı tasjolynda suıytylǵan gaz tasymaldap kele jatqan júk kóligi aýdarylǵany habarlanǵan.