Abaı oblysynda jol qozǵalysyna qaýip tóndirgen júrgizýshi jazalandy

SEMEI. KAZINFORM — Abaı oblysynda jol erejesin buzǵan azamattar anyqtaldy, dep habarlaıdy Polisia.kz.

Abaı oblysynda polıtseıler jol qozǵalysy erejelerin óreskel buzǵan júrgizýshi men tórt jolaýshyny jaýapkershilikke tartty. Olar baǵdarshamnyń qyzyl túsi janyp turǵan kezde kólikten túsip, jol boıynda bı bılegen. 

Belgili bolǵandaı, olar zańdy buzyp ǵana qoımaı, óz áreketterin ádeıi oıyn-saýyq maqsatynda vıdeoǵa túsirgen.

Oqıǵa qoǵamdyq rezonans týdyrdy. Belgili bolǵandaı, jas júrgizýshi kólikti toqtatqannan keıin, tórt jolaýshy salonnan shyǵyp, jol ústinde bıleı bastaǵan. Bul áreketter kólik qozǵalysyna kedergi keltirip, basqa júrgizýshilerge qaýip tóndirgen.

Polıtsııa qyzmetkerleri quqyq buzýshylyqqa qatysqandardyń barlyǵyn jedel anyqtap, bólimshege jetkizdi. Júrgizýshi jolaýshylar men júkterdi tasymaldaý qaǵıdalaryn saqtamaǵany úshin jaýapkershilikke tartyldy. Tórt jolaýshyǵa qoǵamdyq tártip pen azamattardyń tynyshtyǵyn buzatyn, sondaı-aq jol qozǵalysy qaýipsizdigine qater tóndirgen áreketi úshin tıisti shara qabyldandy. 

— Polıtsııa mundaı oıyn saýyqtarǵa jol ústinde múldem jol berilmeıtinin eskertedi. Azamattardy jol qozǵalysy erejelerin qatań saqtap, óz ómiri men aınaladaǵylardyń qaýipsizdigin qaterge tikpeýge shaqyrady, — delingen aqparatta.

Birneshe kún buryn oblysta ishimdik ishken 28 balanyń ata-anasy jaýapqa tartylǵan bolatyn.