Abaı oblysynda jol apatynan qaza tapqandar arasynda Azııa chempıony bar
SEMEI. KAZINFORM – Abaı oblysynda úsh stýdenttiń ómirin qıǵan jol apatyna qatysty jańa derek belgili boldy.
Jol-kólik oqıǵasynan kóz jumǵandardyń biri - Qazaqstan quramasy atynan aralas jekpe-jek boıynsha óner kórsetken 19 jastaǵy Nurmaǵambet Turarbekov ekeni anyqtaldy. Ol komandalastarymen birge Astanada ótken Azııa chempıonatynan Semeıge kele jatqan.
Alikhan Bokeikhan University málimetinshe, stýdentter resmı shaqyrý hat negizinde chempıonatqa qatysýǵa jiberilgen.
- Azııa chempıonatyna qatysý týraly resmı hat kelgennen keıin stýdentterdi sabaqtan bosatyp, jarysqa qatysýyna ruqsat berdik. Ókinishke qaraı, jarystan keıin osyndaı qaıǵyly oqıǵa boldy. Olar sportqa yntaly, oqý men sportty qatar alyp júrgen jastar edi, - dedi ýnıversıtettiń prorektory Azamat Azatov.
Eske salsaq, Abaı oblysyndaǵy tasjolda jeńil kólik pen júk kóligi soqtyǵysyp, 3 adam kóz jumdy.