Abaı oblysynda jol apatynan eki adam kóz jumdy
KÓKPEKTІ. KAZINFORM — Abaı oblysynyń Kókpekti aýdanynda eki kólik bir-birine soǵyldy. Apat saldarynan eki adam qaza tapty.
«102» arnasyna belgisiz er adamnan respýblıkalyq mańyzy bar «Omby-Maıqapshaǵaı» tasjolyndaǵy jol-kólik oqıǵasy týraly habar túsken.
Aldyn ala málimet boıynsha, Mazda 626 markaly avtokóligin basqarǵan 51 jastaǵy Semeı turǵyny basyp ozý manevrin oryndaý kezinde qarsy jolaqqa shyǵyp ketken.
Qarsy baǵytta kele jatqan Mercedes-Benz Sprinter kóligi qaqtyǵysty aınalyp óte almady.
Oqıǵa saldarynan júrgizýshi alǵan jaraqatynan oqıǵa ornynda kóz jumdy. Túrli dene jaraqatymen taǵy bir kóliktiń jolaýshylary aýrýhanaǵa jetkizilip, jatqyzyldy, «Mazda 626» markaly avtokóligindegi 20 jastaǵy jolaýshy aýrýhanada esin jımaı kóz jumǵan.
Atalǵan fakti boıynsha Qylmystyq kodekstiń 345-babynyń 3-bóligi boıynsha sotqa deıingi tergeý bastaldy.
Tıisti saraptamalar taǵaıyndaldy, onyń qorytyndysy boıynsha protsessýaldyq sheshim qabyldanady.
