Abaı oblysynda jol apatynan 4 adam mert boldy

SEMEI. KAZINFORM — Abaı oblysynda eki avtokólik soqtyǵysyp, 4 adam kóz jumdy.

Oblystyq polıtsııa departamenti baspasóz qyzmetiniń habarlaýynsha, jol-kólik oqıǵasy 19 aqpanda saǵat 15:25–te bolǵan.

— Aldyn ala málimet boıynsha, Omby-Maıqapshaǵaı tasjolynyń 867-shaqyrymynda, Salqyn-Tóbe aýylynyń mańynda Lada Priora jáne Chevrolet Cobalt markaly avtokólikter betpe-bet soqtyǵysqan. Sonyń saldarynan 4 adam qaza bolyp, taǵy úsh adam túrli dene jaraqattaryn aldy. Atalǵan derek boıynsha sotqa deıingi tergeý bastaldy, — dep habarlady vedomstvo ókilderi.

Tıisti saraptamalar taǵaıyndalyp, oqıǵanyń barlyq mán-jaıy anyqtalyp jatyr.

Eske salsaq, osyǵan deıin SQO-da júk kóliginiń júrgizýshisi áriptesterin betpe-bet soqtyǵysýdan saqtap qalǵany habarlanǵan.