Abaı oblysynda jol apatynan 3 adam kóz jumdy
SEMEI. KAZINFORM – Abaı oblysynda eki kólik soqtyǵysyp, 3 adam qaza boldy.
Oblystyq Polıtsııa departamenti baspasóz qyzmetiniń málimetine súıensek, jol-kólik oqıǵasy 25 tamyzda saǵat 03:30 shamasynda «Semeı-Óskemen» tasjolynda bolǵan. Toyota Land Cruiser jáne Nissan Elgrand markaly eki kólik soqtyǵysqan.
«Jol apaty saldarynan 1 júrgizýshi men 2 jolaýshy sol jerde qaza boldy. Ártúrli dene jaraqattaryn alǵan 3 adam medıtsınalyq mekemege jatqyzyldy. Atalǵan fakti boıynsha QR QK-niń 345-baby 4-bóligi (Abaısyzda eki jáne odan da kóp adamnyń ólimine ákep soqqan kólik quraldaryn basqaratyn adamdardyń jol qozǵalysy nemese kólik quraldaryn paıdalaný qaǵıdalaryn buzýy) boıynsha sotqa deıingi tergeý bastaldy», - delingen aqparatta.
Qazirgi ýaqytta tıisti saraptamalar taǵaıyndaldy. Tergeý barysy Abaı oblysy Polıtsııa departamenti basshylyǵynyń baqylaýynda.
