Abaı oblysynda joǵalyp ketken er adam 3 apta boıy qojalyqta quldyqta bolǵan

Abaı oblysynda iz-túzsiz joǵalyp ketken psıhıkalyq aýytqýshylyǵy bar adam tabyldy. Anyqtalǵandaı, ol osy ýaqytqa deıin quldyqta bolǵan, dep habarlaıdy Kazinform.

Polıtsııaǵa habarlasqan áıel 50 jastaǵy aǵasynyń habar-osharsyz ketkenin aıtyp, kómek surady. Er adamnyń psıhıkalyq aýytqýshylyǵy bar. Tártip saqshylary dereý ony izdestirýge kóshti.

«Sonyń nátıjesinde, polıtsııa qyzmetkerleri joǵalǵan azamatty tapty. Er adam Semeı qalasynan 200 shaqyrym qashyqtyqta ornalasqan sharýa qojalyǵynda quldyqta bolǵan. Ony aldap, baılanys quraldaryn tartyp alyp, alyp ketken eki kúdikti ustaldy», - dep jazdy Abaı oblystyq Polıtsııa departamentiniń baspasóz qyzmetinen.

Jábirlenýshi úsh apta boıy úı sharýashylyǵyndaǵy jumystarǵa jegilgen. Qazirgi ýaqytta atalǵan fakti boıynsha QR Qylmystyq Kodeksiniń 128-babymen (Adam saýdasy) sotqa deıingi tergeý amaldary júrgizilýde.

Jábirlenýshi týystaryna qaıtaryldy.