Abaı oblysynda joǵalyp ketken 3 jasar bala aıdaladan tabylǵan
ASTANA. KAZINFORM — 8 sáýir kúni Aqsýat aýdanynda 3 jastaǵy bala baıqatpaı úıdiń aýlasynan shyǵyp ketip, joǵalyp ketken.
Tańerteń erte týystary izdeýdi bastap, shamamen saǵat 11:00–de polıtsııaǵa habarlasqan. Osy sátten bastap barlyq kúshter dereý jumyldyryldy.
Birneshe saǵattan keıin izdeý barysynda atpen júrgen polıtsııa qyzmetkeri aıdalada kishkentaı balanyń beınesin baıqaıdy — ol eldi mekennen alys jerde jalǵyz júrgen. Tolqyǵanyn jasyra almaǵan polıtseı balaǵa: «Aınalaıyn, kele ǵoı…» — dep til qatady.
— Saǵat 14:00 shamasynda bala eldi mekennen shamamen 3 shaqyrym jerden tabyldy. Baqytqa oraı, ol aman-esen, ómiri men densaýlyǵyna qaýip joq — bala tek adasyp ketken. Bul oqıǵa — ýaqyttyń ár mınýty mańyzdy ekenin jáne úılesimdi árekettiń mańyzyn eske salady. Keıde naǵyz ǵajaıyp — der kezinde tabylǵan bala, — deıdi tártip saqshylary.
Óz kezeginde balanyń anasy polıtseıge alǵys aıtty.
— 8 sáýir kúni men úshin ómir toqtap qalǵandaı boldy. Men sábıimniń qaıda ekenin bilmedim. Ár mınýt men úshin sheksizdikke aınaldy. Kenetten — habar keldi: tabyldy. Tiri. Atqa mingen polıtsııa qyzmetkeri ony dalada jalǵyz júrgen jerinen taýypty… Sol sátte siz tek bir balany ǵana emes — meni de ómirge qaıta qaıtardyńyz. Siz meniń balamdy qutqardyńyz. Bul — ǵajaıyp. Analyq júregimnen shyqqan alǵysymdy qabyl alyńyz, — deıdi Aqsýat aýdanynyń turǵyny.
Aıdalada joǵalyp ketken sábıdi Abaı oblysy Polıtsııa departamenti Aqsýat aýdany polıtsııa bóliminiń aǵa krımınalısi polıtsııa maıory Baqytbek Lııaskanov taýyp alǵan. Degenmen, ol ózin batyr sanamaıtynyn alǵa tartty.
— Júregimmen onyń dál osy mańda ekenin sezdim. Meni ne jetelegenin bilmeımin… biraq sol kúsh meni sábıdiń júrgen jerine alyp keldi. Men ózimdi batyr sanamaımyn — tek óz jumysymdy atqardym. Biraq qatty ýaıymdadym… sebebi men de ákemin, — dedi ofıtser.
Osydan buryn Aqtóbede bir kúnde eki bala terezeden qulap ketkenin jazdyq.