Abaı oblysynda joǵalǵan er adam bes kúnnen keıin ıen dalada tabyldy
ASTANA. KAZINFORM — 17 naýryz kúni Abaı aýdanynyń bir qystaýynda 56 jastaǵy qoıshy joǵalyp ketti. Sol kúni ol atpen mal izdeýge shyǵyp, qaıta oralmaǵan, dep habarlaıdy oblystyq PD baspasóz qyzmeti.
Habar túsken boıda Abaı aýdanynyń polıtsııa qyzmetkerleri dereý izdestirý jumystaryna kiristi. Іzdeý jumystary táýlik boıy — kúndiz de, túnde de júrgizildi. Jaǵdaı óte qıyn boldy: jolsyz jerler, kúrdeli jer bederi, batpaq topyraq. Tehnıka birneshe ret turyp qalsa da, izdeý bir sátke de toqtatylǵan joq. Operatsııaǵa sharýashylyq ıesi de qatysty. Qatal aýa raıy men tabıǵı jaǵdaılarǵa qaramastan, polıtsııa qyzmetkerleri men qutqarýshylar tabandylyq tanytyp, aýmaqty muqııat tekserip, barlyq yqtımal baǵyttardy qarastyrdy.
Іzdeýdiń besinshi kúni tańsáride joǵalǵan er adam tiri kúıinde tabyldy. Belgili bolǵandaı, ol jylqyny kótermek bolyp aıaǵyn qysyp alǵan. Jaraqatyna baılanysty ózdiginen qozǵala almaı, osy ýaqyt boıy dalada jatqan. Tabylǵannan keıin oǵan sol jerde alǵashqy medıtsınalyq kómek kórsetildi: aıaǵy tańylyp, qolda bar quraldarmen bekitilip, keıin evakýatsııalaýǵa daıyndaldy.
Er adam bolǵan oqıǵany tolqýmen eske alyp, polıtseıler men qutqarýshylarǵa sheksiz rızashylyǵyn bildirdi.
— Bes kún boıy úmit pen kúmánniń arasynda boldym. Aınalam tym-tyrys edi, qozǵala almadym, ár mınýt saǵattaı kórindi. Biraq meni izdep jatqanyn bildim. Tań ata alystan adamdardyń daýsyn estigende, úmitim qaıta oıandy. Sol sátte ómirdiń qanshalyqty qymbat ekenin túsindim. Meni tapqan polıtseıler men qutqarýshylarǵa sheksiz rızamyn. Olardyń tabandylyǵy men adamgershiligi meniń ómirimdi saqtap qaldy, — dedi ol.
Budan buryn Jańaózende 8 aıdan beri iz-tússiz joǵalǵan áıel izdestirilip jatqanyn jazǵan edik.
