Abaı oblysynda jyldamdyq asyrǵan 8 myńnan asa júrgizýshi jaýapqa tartyldy
ASTANA. KAZINFORM — Abaı oblysynda qala syrtyndaǵy trassalarda jyl basynan beri 8000-nan asa quqyqbuzýshylyqtyń joly kesilgen, dep habarlaıdy oblystyq PD baspasóz qyzmeti.
Vedomstvo atap ótkendeı, jol qozǵalysy qaýipsizdigin qamtamasyz etý baǵytynda júrgizilip jatqan jumystardyń negizgi maqsattarynyń biri — jol-kólik oqıǵalarynyń aldyn alý jáne júrgizýshilerdiń jol qozǵalysy qaǵıdalaryn saqtaý mádenıetin qalyptastyrý.
— Jyl basynan beri qala syrtyndaǵy trassalarda quqyqbuzýshylyqtardyń eń kóp úlesin belgilengen qozǵalys jyldamdyǵyn asyrý quraıdy. Osy sanat boıynsha 8148 quqyq buzýshylyqtyń aldy alyndy. Jyldamdyq rejımin saqtaý — jol qozǵalysynyń negizgi talaptarynyń biri. Belgilengen shekten asyrý júrgizýshiniń jol jaǵdaıyna der kezinde áreket etý múmkindigin tómendetip, joldaǵy táýekelderdi arttyrýy múmkin, — deıdi tártip saqshylary.
Sonymen qatar, kólik quralyn joldyń júrý bóliginde ornalastyrý, qarsy baǵytta aıyrysý nemese basyp ozý qaǵıdalaryn buzý, sondaı-aq uıymdastyrylǵan kólik nemese jaıaý júrginshiler kolonnasyn kesip ótý ne onyń quramyna kirý boıynsha 132 quqyq buzýshylyq anyqtaldy. Mundaı jaǵdaılarda árbir júrgizýshi jol qozǵalysyna qatysýshylardyń qaýipsizdigin eskerip, manevr jasaý kezinde belgilengen talaptardy saqtaýy qajet.
Sondaı-aq, jol qozǵalysy qaǵıdalarynda tyıym salynǵan jaǵdaılarda qarsy baǵyttaǵy qozǵalys jolaǵyna shyǵý, onyń ishinde keri burylý nemese burylý kezinde qarsy jolaqqa shyǵý boıynsha 14 quqyqbuzýshylyqtyń joly kesildi.
Budan bólek, jol qozǵalysy qaǵıdalaryn buzý saldarynan apattyq jaǵdaı týǵyzý, ıaǵnı basqa qozǵalys qatysýshylaryn jyldamdyǵyn nemese qozǵalys baǵytyn kúrt ózgertýge májbúr etý boıynsha 183 quqyq buzýshylyq anyqtaldy. Joldaǵy árbir áreket ózge júrgizýshiler men jaıaý júrginshilerdiń qaýipsizdigine áser etetindikten, qozǵalys kezinde belgilengen talaptardy saqtaý mańyzdy.
Polıtsııa departamenti jol qozǵalysy qaýipsizdigi tek baqylaý sharalarymen ǵana emes, árbir azamattyń jaýapkershiligimen de qamtamasyz etiletinin alǵa tartty. Jol belgilerin saqtaý, belgilengen jyldamdyq rejıminen aspaý, qaýipsiz araqashyqtyqty ustaný jáne ózge jol qozǵalysyna qatysýshylardy qurmetteý — qaýipsiz qozǵalystyń negizgi qaǵıdalary. Árbir júrgizýshiniń tártiptiligi men jaýapkershiligi joldaǵy qaýipsiz ortany qalyptastyrýǵa yqpal etedi. Jol qozǵalysy qaǵıdalaryn saqtaý — zań talaby ǵana emes, adam ómiri men densaýlyǵyn qorǵaýdyń mańyzdy sharty.
Budan buryn Abaı oblysy PD qatary jyl basynan beri 68 jas mamanmen tolyqqanyn jazdyq.
