Abaı oblysynda jyl sońyna deıin 10 aýyl ınternetke qosylady
ASTANA. KAZINFORM — Abaı oblysynyń ákimdigi Jasandy ıntellekt jáne tsıfrlyq damý mınıstrligimen birlesip jańa tehnologııanyń kómegimen birqatar joba ázirlenip jatyr. Tolyǵyraq óńir basshysy Berik Ýálı aıtyp berdi.
— Olardyń qatarynda eńbek mobıldiligi ortalyǵy úshin onlaın-kezek basqarý júıesi, oblystyń kıeli oryndarynyń gologrammasy, SRM-júıesi, deldal-bot, AssylAI jobasy, bos jumys oryndaryn izdeý jáne jumysqa ornalastyrýǵa arnalǵan Jidek.kz portaly, respýblıkalyq deńgeıde alǵash ret iske qosylǵan sanminimum.kz avtomattandyrylǵan portaly, — dedi Berik Ýálı ortalyq kommýnıkatsııalar qyzmeti alańynda óńirdiń 9 aı ishindegi áleýmettik-ekonomıkalyq damýy týraly esep bere turyp.
Ákimniń aıtýynsha, joǵaryda atalǵan jobalardy júzege asyrý úshin sapaly ınternetpen qamtý qajet.
— Jyl sońyna deıin 10 aýyl ınternet jelisine qosylady. 2026 jyldan bastap oblystyń 179 aýylyn, 343 áleýmettik nysandy talshyqty-optıkalyq jelige qosý josparlanyp otyr. Odan bólek, Jusan Mobile aktsıonerlik qoǵamy 26 shalǵaı aýyl OneWeb spýtnıktik tehnologııasy arqyly ınternetke qosylady. Kelesi jyly aýyldy ınternet qamtý 96%-ǵa jetedi dep kútilip otyr. Sonymen qatar, respýblıkalyq jáne oblystyq avtojoldar boıyndaǵy antenna dińgek qurylysy 2027 jyly tolyq aıaqtalady, — degen esep berdi Berik Ýálı.
Sondaı-aq Berik Ýálı Semeıde ónerkásip óndirisin keńeıtýge 500 gektar jer bólinetinin málim etti.
Aıta ketsek, jyl sońynda deıin Abaı oblysynda 255 jumys ornymen qamtıtyn 7 joba júzege asyrylady.
Sonymen qatar oblys ákimi Alakóldiń týrıstik jáne ınvestıtsııalyq áleýetine qatysty túsinik berdi.
Buǵan deıin habarlaǵanymyzdaı bıyl Abaı oblysynda ınvestıtsııa tartý 103,1 paıyzǵa ósken.