Abaı oblysynda jyl basynan beri qos azamattyq úshin 15 adam jaýapqa tartyldy

ASTANA. KAZINFORM — Abaı oblysy Polıtsııa departamenti shetel azamattyǵyn jasyrý derekterin anyqtaý jumystaryn kúsheıtti.

Vedomstvo atap ótkendeı, Qazaqstan zańnamasy boıynsha qos azamattyqqa qatań túrde tyıym salynǵan. 

«Qazaqstan Respýblıkasynyń azamattyǵy týraly» Zańnyń 3-babyna sáıkes, elimizdiń azamaty basqa eldiń azamattyǵynda dep tanylmaıdy. Shet memlekettiń tólqujatyn ıelengen burynǵy qazaqstandyqtar, zańdyq qıyndyqtarǵa tap bolmas úshin, 30 kún ishinde Qazaqstannyń sheteldegi konsýldyǵyna ne jergilikti ishki ister organdaryna habarlasýy qajet.

— Ýaqtyly eskertý jasalmaǵan jaǵdaıda, 200 aılyq eseptik kórsetkishke deıin aıyppul salynady (786 400 teńge), ne bolmasa el aýmaǵynan shyǵarý sharasy qoldanylady (QR ÁQBtK 496-bap). 2025 jyldyń basynan beri óńirde osy bap boıynsha 15 sheteldikke ákimshilik jaza qoldanyldy. Onyń ishinde 7 azamat elden shyǵarylsa, 8 adamǵa aıyppul belgilendi, — delingen habarlamada.

Sondaı-aq, aǵymdaǵy jyldyń alǵashqy jartyjyldyǵynda kóshi-qon qyzmeti basqarmasy aýdandyq bólimshelermen birlese otyryp, Qazaqstan azamattyǵynan shyǵýǵa qatysty 451 ótinishti tirkedi. Bul ótinimder Reseı, Túrkııa, AQSh, Qyrǵyz Respýblıkasy men Chehııa turǵyndarynan túsken.

Abaı oblysynyń Polıtsııa departamenti qos azamattyqqa jol bermeýge jáne Qazaqstan Respýblıkasynyń zań talaptaryn qatań saqtaýǵa shaqyrady.

Budan buryn ІІM basshysy Qazaqstanda qos azamattyqqa qatysty jaza kúsheıtiletinin jetkizgen edi.