Abaı oblysynda jyl basynan beri 428 mas júrgizýshi ustaldy
ASTANA. KAZINFORM — Osy apta ishinde jedel-profılaktıkalyq is-sharalar barysynda osyndaı 35 quqyq buzýshylyqtyń joly kesildi, dep habarlaıdy Abaı oblysy Polıtsııa departamentiniń baspasóz qyzmeti.
Abaı oblysynda mas kúıinde kólik júrgizetin júrgizýshilerge qarsy kúres jalǵasyp keledi. Kólik quralyn alkogoldik masań kúıde basqarýdyń árbir anyqtalǵan deregi medıtsınalyq kýálandyrý nátıjelerimen rastalyp, protsessýaldyq sheshim qabyldaý úshin sotqa joldanady. Quqyq buzýshylardy qatań jaýapkershilik, onyń ishinde kólik quralyn basqarý quqyǵynan aıyrý jazasy kútedi.
2026 jyldyń basynan beri Abaı oblysynyń polıtsııa qyzmetkerleri kólik quralyn alkogoldik masań kúıde basqarýdyń 428 deregin anyqtady. Tek sońǵy bir apta ishinde jedel-profılaktıkalyq is-sharalar barysynda osyndaı 35 quqyq buzýshylyqtyń joly kesildi.
Sońǵy oqıǵalardyń biri Semeı qalasynda oryn aldy. Profılaktıkalyq is-sharalar kezinde polıtsııa qyzmetkerleri Lada 11183 avtokóligin basqarǵan 39 jastaǵy júrgizýshini toqtatty. Er adamǵa alkogoldik, esirtkilik nemese ýytqumarlyq masań kúıin anyqtaý úshin medıtsınalyq kýálandyrýdan ótý usynylǵanymen, ol polıtsııa qyzmetkerleriniń zańdy talabyn oryndaýdan bas tartty.
Júrgizýshi ákimshilik jaýapkershilikke tartyldy. Іs materıaly sotqa joldandy. Medıtsınalyq kýálandyrýdan ótýden bas tartqany úshin zańnamada 15 táýlikke ákimshilik qamaý jáne 8 jyl merzimge kólik quralyn basqarý quqyǵynan aıyrý jazasy kózdelgen.
Zańnamanyń qatańdatylǵanyna jáne jazanyń sózsiz qoldanylatynyna qaramastan, keıbir júrgizýshiler áli de ózderiniń jáne aınalasyndaǵylardyń ómirine sanaly túrde qaýip tóndirýdi jalǵastyryp jatyr.
— Mas júrgizýshi — jol qozǵalysyna qatysýshylardyń ómiri men densaýlyǵyna tónetin yqtımal qaýip. Alkogol ishkennen keıin kólik basqarý qaıǵyly saldarǵa ákelýi múmkin. Eger siz mas kúıindegi adamnyń kólik tizginine otyrǵanyn baıqasańyz, bul týraly dereý polıtsııaǵa habarlańyz. Múmkin, dál sizdiń qońyraýyńyz jol-kólik oqıǵasynyń aldyn alyp, bireýdiń ómirin saqtap qalýǵa kómekteser, — deıdi tártip saqshylary.
Buǵan deıin SQO-da eki aıda 150-ge jýyq mas júrgizýshi ustalǵany anyqtaldy.
