Abaı oblysynda «Jasyl el» jasaqtary 30-ǵa jýyq saıabaqty tazalady
SEMEI. KAZINFORM – Abaı oblysynda «Jasyl el» jasaqtarynyń jumysy jalǵasyp jatyr. Basty maqsat – jastardy qaıyrymdylyqqa baýlyp, týǵan jerdiń tazalyǵyna atsalysýǵa shaqyrý. Bıylǵy maýsymda jobaǵa 350-den astam jas qatysyp, óńirdiń ártúrli eldi mekenderinde 30-ǵa jýyq saıabaqty tazalap úlgergen.
«Kýrchatov qalasynda «Jasyl el» sarbazdary aramshóp julýmen jáne shóp shabýmen aınalysady. Olardyń kúshimen Jastar saıabaǵyndaǵy sýburqaqtyń janyndaǵy trotýarlar aramshópterden tazartyldy. Qazirgi tańda jumystar 1 gektar aýmaqty qamtyp, 50 tekshe metr shóp shabyldy», - dep habarlady Abaı oblysy ákimdiginen.
Borodýlıha aýdanynda sarbazdar uıym qyzmetkerlerimen birge jol jıekterin jańartyp, shóp shabý jumystaryn júrgizdi. Úrjar aýdanynda Jastar jáne Jeńis saıabaqtaryn tazartý, ári kógaldandyrý jumystary atqaryldy. Aıagóz aýdanynda bıyl «Jasyl el» jasaǵynda 35 adam jumys isteıdi.
«Osy jańa ýaqytta – bilimge, jumys isteýge jáne ósýge degen umtylys qajet. Jastarǵa tegin jeıdeler, qalpaqtar men qolǵaptar berilýde. Olar aýdandy kógaldandyrýmen, aramshóp julýmen, jol boıyndaǵy aýmaqtardy abattandyrýmen aınalysady. Jumyspen qamtylǵan jastardyń týǵan jeriniń abattandyrý isine qurmetpen qaraýy mańyzdy», - deıdi Aıagóz aýdanynyń «Jasyl el» jastar eńbek jasaǵynyń basshysy Baqtııar Áben.
«Jasyl el» eńbek jasaǵynyń jumysy bastalǵaly beri 5 tonnadan astam qoqys shyǵaryp, gúl egý jáne sýarý jumystary júrgizildi. Nátıjesinde, 4 000 sharshy metrden astam jer abattandyryldy. Jastardyń bul jumystary shilde, tamyz aılarynda da jalǵasady.
